ისრაელური გამოცემა Israel Hayom პოსტსაბჭოთა ქვეყნებიდან ემიგრაციის საკითხებში ისრაელის ყოფილი პრემიერმინისტრის, ბენიამინ ნეთანიაჰუს მრჩევლის, არიელ ბულშტეინის სტატიას აქვეყნებს. ავტორი ჰადსონის ინსტიტუტის კვლევაზე დაყრდნობით საქართველოში პროირანული ქსელის არსებობას განიხილავს.

კვლევის თანაავტორი და ჰადსონის ინსტიტუტის უფროსი მეცნიერ-თანამშრომელი, ლუკ კოფი, ბულშტეინს განუცხადა: „თუ ქართულ ოცნებას ტრამპის ადმინისტრაციისთვის სერიოზული სიგნალის გაგზავნა სურს, ხელისუფლების მხრიდან ამ ქსელების წინააღმდეგ ხილული მოქმედება უნდა ვიხილოთ — არა სიმბოლური ჟესტი, არამედ მათი ნამდვილი და სრული დემონტაჟი.”

კოფიმ ასევე ხაზი გაუსვა, რომ ქართული ოცნება ირანელი აგენტების წინააღმდეგ ნაბიჯების გადადგმის ნაცვლად კვლევის თანაავტორ, გიორგი კანდელაკის წინააღმდეგ საქმის აღძვრით იმუქრება. „ქართულმა ოცნებამ უნდა გაიგოს, რომ პრეზიდენტი ტრამპი არ მოითმენს სიტუაციას, სადაც IRGC ქვეყნის შიგნით თავისუფლად მოქმედებს” — განაცხადა მანვე.

სტატია ხაზს უსვამს, რომ „საქართველოს მოქალაქეები დასავლეთისა და ისრაელის საზღვრებთან ნაკლებ ეჭვს ბადებენ” — ეს კი, კოფი-ბულშტეინის შეფასებით, ირანმა სტრატეგიულად გამოიყენა. ამ კონტექსტში სტატია მოიხსენიებს ორ კონკრეტულ საქმეს: ნიუ-იორკში დაკავებულ საქართველოს მოქალაქე ფოლად ომაროვს, რომელიც ირანელ-ამერიკელი ჟურნალისტის მკვლელობაში დამნაშავედ ცნეს, და ათენში ამერიკული სამხედრო ობიექტების დაზვერვის ბრალდებით დაკავებულ საქართველოს მოქალაქეს.

კოფიმ ასევე გააფრთხილა, რომ სავარაუდო ამერიკა-ირანის ბირთვული შეთანხმება ირანს დამატებით რესურსებს მისცემს, მათ შორის საქართველოში ქსელის გასაძლიერებლად. „ისრაელმა ამ პროცესში თავის ამერიკელ პარტნიორებთან ერთად უნდა იმუშაოს, რომ IRGC-ის გარეგანი ქსელები ქართულ ოცნებასთან დიალოგში მკაფიოდ გახდეს განხილული” — დაამატა მანვე.

კვლევა, რომელიც 3 მარტს გამოქვეყნდა, „ჰადსონის ინსტიტუტმა” ქართველ ოპოზიციონერ პოლიტიკოსებთან დაკავშირებული სუს-ის გამოკითხვებიდან მალევე გამოაქვეყნა. სუს-ის ცნობით, გამოძიება დაწყებულია სისხლის სამართლის კოდექსის 319-ე მუხლით, რაც „მტრულ საქმიანობაში დახმარებას” გულისხმობს და 7-დან 15 წლამდე პატიმრობას ითვალისწინებს.