წარმომადგენელთა პალატის შეიარაღებული ძალების კომიტეტმა 4 ივნისს დაამტკიცა NDAA-ს პროექტში ორი შესწორება, რომელთა თანაავტორია რესპუბლიკელი კონგრესმენი ჯო უილსონი.

პოლიტპატიმრების შესწორება: კომიტეტი „შეშფოთებულია საქართველოში ოპოზიციონერი ლიდერების, აქტივისტებისა და სხვა პირების მიმართ მიმდინარე დაკავებებისა და პატიმრობის პრაქტიკით, რომელთაც ფართოდ მიიჩნევენ პოლიტპატიმრებად.” შესწორება თავდაცვის მდივანს ავალებს, 2026 წლის 1 ოქტომბრამდე კომიტეტს წარუდგინოს სტრატეგია, თუ როგორ აპირებს სამინისტრო ამ საკითხის ინტეგრირებას საქართველოსთან სამხედრო თანამშრომლობის ფარგლებში.

სადაზვერვო ანგარიშის შესწორება: მეორე შესწორება მოითხოვს, NDAA-ს ამოქმედებიდან 180 დღის ვადაში კომიტეტს წარუდგინოს გასაიდუმლოებული ანგარიში საქართველოში რუსეთისა და ჩინეთის სადაზვერვო უჯრედების შესახებ.

კომიტეტის მიერ პროექტის მიღების შემდეგ NDAA სენატის შეიარაღებული ძალების კომიტეტს გადაეგზავნება. შემდეგ ეტაპზე ორივე პალატის შეჯერებული ტექსტი კენჭს ეყრება კონგრესში, ხოლო საბოლოო ვარიანტი ხელმოსაწერად პრეზიდენტ ტრამპს წარედგინება.

შეგახსენებთ, 21 აპრილს კონგრესმენებმა ჯო უილსონმა და სტივ კოენმა (დემოკრატი) ორპარტიული კანონპროექტი — „ჩინეთის კავკასიაზე კონტროლის საწინააღმდეგო აქტი” — წარადგინეს, რომელიც კრემლისა და პეკინის გავლენის მასშტაბის დოკუმენტირებას მოითხოვს.