მთავრობის ოპონენტებმა შეშფოთება გამოთქვეს იმის გამო, რომ საქართველო კვლავ არ მიიწვიეს ნატოს ყოველწლიურ სამიტზე, რომელიც თურქეთის დედაქალაქ ანკარაში იმართება. ამავდროულად, „ქართული ოცნების“ საგარეო საქმეთა მინისტრი მაკა ბოჭორიშვილი ანკარაში მიემგზავრება, სადაც სამიტის ფარგლებში დაგეგმილ ღონისძიებაში „მოკავშირეები ანკარაში“ მიიღებს მონაწილეობას.

ანკარა 7-8 ივლისს ნატოს ყოველწლიურ ღონისძიებას მასპინძლობს, რომლის მთავარი თემა თავდაცვის დაფინანსების გაუმჯობესება, თავდაცვის ინდუსტრიის გაძლიერება და უკრაინის მხარდაჭერაა. ღონისძიებაზე ნატოს, მოკავშირე და პარტნიორი ქვეყნების ოფიციალური პირები იკრიბებიან.

სამიტის ფარგლებში ოფიციალურ შეხვედრებს გამართავენ ან დაესწრებიან არაწევრი ქვეყნების ოფიციალური პირები, მათ შორის უკრაინის პრეზიდენტი ვოლოდიმირ ზელენსკი, სამხრეთ კორეის პრეზიდენტი ლი ჯე მიუნგი, ასევე ავსტრალიის, ახალი ზელანდიის, იაპონიის, ბაჰრეინის, ქუვეითის, ყატარის და არაბთა გაერთიანებული საამიროების თავდაცვის ან საგარეო საქმეთა მინისტრები, ასევე ევროკავშირის ოფიციალური პირები: ევროპული საბჭოს პრეზიდენტი ანტონიუ კოშტა და ევროკომისიის პრეზიდენტი ურსულა ფონ დერ ლაიენი.

ალიანსის დიდი ხნის ახლო პარტნიორი საქართველო უკვე ზედიზედ მეორე წელია არ მონაწილეობს სამიტის ფარგლებში დაგეგმილ არცერთ მნიშვნელოვან ოფიციალურ შეხვედრაში ან ვახშამზე, 2023 წლის ვილნიუსის სამიტსა და 2024 წლის ვაშინგტონის სამიტზე საქართველოს მაშინდელი საგარეო საქმეთა მინისტრი ილია დარჩიაშვილი წარმოადგენდა.

საქართველოს საგარეო საქმეთა სამინისტრომ 6 ივლისს განაცხადა, რომ მინისტრი მაკა ბოჭორიშვილი მონაწილეობას მიიღებს ღონისძიებაში „მოკავშირეები ანკარაში“, რომელიც თურქეთის რესპუბლიკის კომუნიკაციების დირექტორატის, პოლიტიკის, ეკონომიკისა და სოციალური კვლევების ფონდის (SETA) და მიუნხენის უსაფრთხოების კონფერენციის (MSC) ორგანიზებით იმართება. ღონისძიება, რომელიც სამიტის ფარგლებში იმართება, მოიცავს მრგვალ მაგიდებს, პანელურ დისკუსიებს და სხვა ფორმატებს „თავდაცვის პოლიტიკის ყველაზე აქტუალურ თემებზე“.

ოპონენტები შეშფოთებას გამოთქვამენ

პოლიტიკური და პროფესიული წრეების წარმომადგენლებმა შეშფოთება გამოთქვეს იმის გამო, რომ საქართველო, რომელიც ტრადიციულად ასეთ სამიტებს ალიანსთან დაახლოების ხელშეწყობისა და თანამშრომლობის პერსპექტივების გასაძლიერებლად იყენებდა, თანდათანობით გამოიდევნა ნატოს პლატფორმებიდან, რაც, მათი თქმით, 2024 წლის ვაშინგტონის სამიტით დაიწყო.

ყოფილი თავდაცვის მინისტრისა და ანალიტიკური ცენტრის, „სამოქალაქო იდეის“ დამფუძნებლის, თინათინ ხიდაშელის თქმით, საქართველოს არმიწვევის გადაწყვეტილება შეესაბამება 2024 წლის ვაშინგტონის სამიტის შემდეგ ჩამოყალიბებულ პრაქტიკას, როდესაც „საქართველოს მთავრობა დემოკრატიული უკუსვლის გამო პარტნიორული ღონისძიებებიდან გამოირიცხა“.

მან ასევე აღნიშნა, რომ „ქართული ოცნების“ პირობებში ნატო-თბილისის ურთიერთობები „ფაქტობრივად გაყინულია და მოსაწვევებიც შესაბამისად არ ჩანს“. ხიდაშელის თქმით, სამიტის წინა ანალიტიკური პუბლიკაციების უმრავლესობა და სამიტის დღის წესრიგი საქართველოს საერთოდ არ ახსენებს.

საქართველოს დიპლომატთა საზოგადოებამ, რომელიც „ქართული ოცნების“ მიმართ კრიტიკულად განწყობილ ყოფილ დიპლომატებსა და კარიერულ დიპლომატებს აერთიანებს, განაცხადა, რომ გარდატეხა 2024 წლის ვაშინგტონის სამიტზე მოხდა, სადაც საქართველო დეკლარაციაში მხოლოდ ოკუპირებული ტერიტორიების კონტექსტში არის მოხსენიებული და აღარ არსებობს ჩანაწერები „წევრობაზე, ინტეგრაციასა და რეფორმებზე“. ორგანიზაციის თქმით, 2025 წლის ჰააგისა და 2026 წლის ანკარის სამიტებზე საქართველო საერთოდ აღარ ფიგურირებს.

„ამ ფონზე, საგარეო საქმეთა მინისტრის მონაწილეობა სამიტის პარალელურ ღონისძიებაში ვერ იქნება შეფასებული იმავე პოლიტიკური და დიპლომატიური მნიშვნელობის მიღწევად, რასაც ნატო-ს სამიტის ოფიციალურ ფორმატებში მონაწილეობა წარმოადგენს“, – განაცხადა ორგანიზაციამ.

„ე.წ. „გვერდითი ღონისძიებების“ პოლიტიკური წონა და გადაწყვეტილებების მიღებაზე გავლენა ვერ შეედრება სამიტის ოფიციალურ ფორმატებს, სადაც ალიანსის წევრი სახელმწიფოების ლიდერები და პარტნიორები სტრატეგიული მნიშვნელობის საკითხებს განიხილავენ. სწორედ ასეთ ფორმატებში მონაწილეობდა საქართველო წლების განმავლობაში, როდესაც ნატო-ს პოლიტიკური დღის წესრიგის მნიშვნელოვან ნაწილს წარმოადგენდა“, – აღნიშნა ორგანიზაციამ.

მანამდე, ოპოზიციურმა პარტიამ „დროამ“ აღნიშნა, რომ „საქართველოს აღარ იწვევენ იქ, სადაც რეგიონული მშვიდობის საკითხები წყდება, სადაც ჩვენი უსაფრთხოებისთვის სასიცოცხლოდ მნიშვნელოვანი თემები განიხილება, სადაც უმაღლეს დონეზე უნდა იყოს წარმოდგენილი საქართველოს ნებისმიერი ხელისუფლება, რომელსაც ქვეყნის უსაფრთხოება, ტერიტორიული მთლიანობის აღდგენა და ხანგრძლივვადიანი მშვიდობა ადარდებს“.

„ქართული ოცნება“ კრიტიკას „პროპაგანდისტულ კამპანიას“ უწოდებს

სადავო პარლამენტის ვიცე-სპიკერმა, გიორგი ვოლსკიმ, კრიტიკა „უშველებელ პროპაგანდისტულ კამპანიად“ შეაფასა და განაცხადა, რომ ანკარის სამიტზე „არც ერთი არაწევრი ქვეყანა არ დაუპატიჟებიათ“.

„ადრე ისეთი ფორმატი იყო, როცა ნატო-ს სამიტი იკრიბებოდა, პარტნიორ ქვეყნებთანაც ხდებოდა შეხვედრა. ახლა ასეთი თანმხლები ფორუმი არ იკრიბება, სამაგიეროდ, ამავე პერიოდში, მიუნხენის უსაფრთხოების კონფერენციის ფორმატი იკრიბება ანკარაში, სადაც საგარეო საქმეთა მინისტრი გაემგზავრა და ხვალ გამოსვლა ექნება“, – განაცხადა მან.

ანკარის სამიტზე საუბრისას „ქართული ოცნების“ საპარლამენტო უმრავლესობის ლიდერმა, ირაკლი კირცხალიამ, 6 ივლისს განაცხადა: „როცა სადმე არ მიგვიწვევენ, ძალიან ნაკლებს ვფიქრობთ ამ თემასთან დაკავშირებით“.