საქართველოს შინაგან საქმეთა სამინისტრომ 10 ივნისს განაცხადა, რომ 48 საათის განმავლობაში, თბილისსა და რეგიონებში ჩატარებული საპოლიციო ღონისძიებების შედეგად ნარკოდანაშაულის ბრალდებით 119 პირია დაკავებული, მათ შორის 49 ნარკოდილერი. დაკავებულებს შორის საქართველოს და უცხო ქვეყნის მოქალაქეები არიან.

თბილისის პოლიციის დეპარტამენტის დირექტორმა ვაჟა სირაძემ ბრიფინგზე განაცხადა, რომ ჩხრეკების შედეგად ამოიღეს „განსაკუთრებით დიდი ოდენობით” სხვადასხვა ნარკოტიკი: ჰეროინი, კოკაინი, ალფა-პვპ, მეთადონი, მეფედრონი, ბუპრენორფინი და სხვა. ასევე ამოიღეს ნარკოტიკის დაფასოებისთვის გამოყენებული მასალები, ვარაუდით — ნარკოტიკის გასაღებიდან მიღებული ნაღდი ფული, ცეცხლსასროლი იარაღი და საბრძოლო მასალა.

სირაძის თქმით, ნარკოდილერები სისტემატურად ასაღებდნენ ნარკოტიკებს გარკვეული ანაზღაურების სანაცვლოდ. „საპოლიციო დანაყოფები მთელი ქვეყნის მასშტაბით, უწყვეტ რეჟიმში განაგრძობენ ბრძოლას ორგანიზებული დანაშაულის, მათ შორის ნარკოდანაშაულის წინააღმდეგ,” — განაცხადა მან.