ნობელის პრემიის 112 ლაურეატმა ხელი მოაწერა ერთობლივ განცხადებას, რომელიც ირანელი უფლებადამცველისა და ნობელის მშვიდობის პრემიის ლაურეატის ნარგეს მოჰამადის გათავისუფლებას ითხოვს.

„ნობელიანტ ქალთა ინიციატივის” და „ნარგესის ფონდის” კოორდინაციით მომზადებული განცხადება მიუთითებს, რომ მოჰამადის ჯანმრთელობა „კრიტიკულ” მდგომარეობაშია — მას წონის მკვეთრი კლება, არასტაბილური წნევა და გულის სერიოზული სიმპტომები აქვს. ლაურეატები შეიშფოთებულები არიან, რომ „სიცოცხლე მყისიერი საფრთხის” წინაშე შეიძლება იყოს.

10 მაისს ნარგეს მოჰამადი სასწრაფო დახმარებით „თეირან ფარსის საავადმყოფოში” გადაიყვანეს. ოფიციალურ ჰოსპიტალიზაციას ხელმომწერები მიესალმნენ, მაგრამ ხაზი გაუსვეს, რომ ამით „პატიმრობის უსამართლობა არ გაქარწყლდება”.

„არავინ უნდა იყოს პატიმრობაში მშვიდობიანი პროტესტის ან ადამიანის უფლებების დაცვის გამო” — განაცხადა ნობელის მშვიდობის პრემიის 1997 წლის ლაურეატმა ჯოდი უილიამსმა.

ნობელის ლაურეატი ტავაკოლ კერმანი მოჰამადს „რეპრესიების წინაშე აღმდგარი ქალების უშიშარ ხმად” მოიხსენია.

ნარგეს მოჰამადი ბოლო ათი წლის განმავლობაში არაერთხელ დააპატიმრეს. ბოლოჯერ — 2026 წლის 8 თებერვალს — მას 7,5 წლიანი სასჯელი მიესაჯა. განცხადების ავტორები ირანის ხელისუფლებასა და საერთაშორისო თანამეგობრობას მოუწოდებენ, უზრუნველყონ არა მხოლოდ მისი გათავისუფლება, არამედ ადეკვატური სამედიცინო მომსახურებაც.