ნობელის პრემიის 112 ლაურეატმა ხელი მოაწერა განცხადებას, რომელიც ირანს ნობელის მშვიდობის პრემიის ლაურეატის, ქალი უფლებადამცველის ნარგეს მოჰამადის გათავისუფლებას ითხოვს.

განცხადება „ნობელიანტ ქალთა ინიციატივისა” და „ნარგესის ფონდის” კოორდინაციით მომზადდა. ხელმომწერებს შორის არიან ნობელის ლაურეატები ქიმიაში, ეკონომიკაში, ფიზიკაში, ლიტერატურაში, მედიცინასა და მშვიდობაში.

„ნარგესის ფონდისა” და სხვა სანდო წყაროების თანახმად, მოჰამადის ფიზიკური მდგომარეობა „კრიტიკულია” — მას აქვს წონის მკვეთრი კლება, არასტაბილური წნევა და გულის სერიოზული სიმპტომები. ლაურეატებს მიაჩნიათ, რომ მისი სიცოცხლე „მყისიერი საფრთხის” წინაშე შეიძლება იყოს.

„არავინ უნდა იყოს პატიმრობაში პროტესტის მშვიდობიანად გამოხატვის ან ადამიანის უფლებების დაცვის გამო,” — განაცხადა ნობელის მშვიდობის პრემიის 1997 წლის ლაურეატმა ჯოდი უილიამსმა. კიდევ ერთმა ნობელიანტმა, ტავაკოლ კერმანმა, მოჰამადი „რეპრესიების წინაშე აღმდგარი ქალების უშიშარ ხმად” მოიხსენია.

10 მაისს ნარგეს მოჰამადი სასწრაფო დახმარებით „თეირან ფარსის საავადმყოფოში” გადაიყვანეს, სადაც ახლა სპეციალიზებული სამედიცინო გუნდი მკურნალობს. ლაურეატებს კი მიაჩნიათ, რომ ჰოსპიტალიზაცია არ აქარწყლებს „მისი პატიმრობის უსამართლობას”.

ბოლო ათი წლის განმავლობაში ნარგეს მოჰამადი არაერთხელ იყო დაპატიმრებული. ბოლო განაჩენი — შვიდ-ნახევარი წელი — 2026 წლის 8 თებერვალს გამოიტანეს.