ბათუმის საქალაქო სასამართლოს მოსამართლე ალექსანდრე გოგუაძემ მზია ამაღლობელის ადმინისტრაციული წესით დაკავება კანონიერად ცნო და არ დაამტკიცა დაცვის მხარის სარჩელი. სხდომათა დარბაზს გადაწყვეტილება ხმაურით და შეძახილებით შეხვდა — „აბსურდის თეატრია სასამართლო.”

ამ სხდომაზე ამაღლობელის ადვოკატმა სასამართლოს სამი შუამდგომლობით მიმართა, მათ შორის — ამაღლობელს მიეცეს საშუალება შეზღუდული სივრციდან ადვოკატის გვერდით ჩამოჯდეს. მოსამართლე გოგუაძემ ეს შუამდგომლობა უარყო: „ის სპეციალურ გამოყოფილ ადგილზე ჯდება, კონტაქტს არ გიზღუდავთ იქ სადაც არის. ამ შუამდგომლობას არ ვაკმაყოფილებ.”

სხდომაზე მტკიცებულების სახით ვიდეომასალა იქნა გამოკვლეული. ადვოკატი ნინო ხუციშვილი ამბობს, რომ კადრები ცხადად ასახავს: „მზია ამაღლობელმა ჭიშკრის კედელზე უბრალოდ მიამაგრა სტიკერი, ბატონი გრიგოლ ბესელია მიდის და მიჰყავს პოლიციის დეპარტამენტში, სხვა პოლიციელზე გადაცემა არ ხდება — უწყვეტ კადრში ჩანს: გრიგოლ ბესელიამ დააკავა.” დაცვის მხარე ითხოვდა შსს-ს ყოფილი და მოქმედი მაღალჩინოსნების — გოჩა ვანაძისა და გრიგოლ ბესელიას — გამოკითხვის მასალები საქმეში დაერთოს.

მზია ამაღლობელი 2025 წლის 11 იანვარს დააკავეს ბათუმის პოლიციის მთავარი სამართველოს შენობასთან ადმინისტრაციული სამართალდარღვევის ფაქტზე — კარის კედელზე სტიკერი „იფიცება საქართველო” გაეკრა.