საქართველოს გარემოს დაცვისა და სოფლის მეურნეობის სამინისტრომ 5 ივნისს 400 000-ლარიანი ტენდერი გამოაცხადა მურა დათვის მდგომარეობის შესასწავლად. კვლევის მიზანია პოპულაციის საკონსერვაციო სტატუსისა და რიცხოვნობის შესახებ არსებული მონაცემების განახლება IUCN-ის წითელი ნუსხის უახლესი კრიტერიუმების შესაბამისად.

სამინისტროს განმარტებით, წითელი ნუსხა ყოველ 10 წელიწადში განახლდება. დაცულ ტერიტორიებზე მურა დათვის მონიტორინგი მიმდინარეობს, თუმცა პოპულაციის სრული სურათის დასადგენად საჭიროა კვლევა, რომელიც დაცული ტერიტორიების გარეთ არსებულ სივრცეებსაც მოიცავს.

ტენდერის მიხედვით, კვლევა უნდა მოიცავდეს: პოპულაციის ზომის, გავრცელების არეალისა და ჰაბიტატის შეფასებას; IUCN-ის კრიტერიუმებით საკონსერვაციო სტატუსის განახლებას; ადამიანსა და მურა დათვს შორის კონფლიქტის რისკების ანალიზს; და გრძელვადიანი გადარჩენის უზრუნველსაყოფად რეკომენდაციების შემუშავებას.

წინადადებების მიღების ვადა 8 ივნისს სრულდება.