კიევთან ახლოს იმ ქალის ცხედარი იპოვეს, რომელიც მონაკოში ბიზნესმენზე თავდასხმაში იყო ეჭვმიტანილი. ინფორმაციას „უკრაინსკა პრავდა“ ავრცელებს. გამოცემის ინსაიდერების ცნობით, ანასტასია ბერეზოვსკაიას ცხედარი 6 ივლისს აღმოაჩინეს. წყაროები ადასტურებენ, რომ ქალი ცეცხლსასროლი იარაღით არის მოკლული.

სამართალდამცავ სტრუქტურებში „უკრაინსკა პრავდას“ კიდევ ერთი წყარო ატყობინებს, რომ მკვლელობის საქმეზე უკვე დაკავებულია ორი ეჭვმიტანილი: უკრაინის სამხედრო დაზვერვის (ГУР) ოფიცერი და ყოფილი სამართალდამცველი.

მანამდე ინტერპოლმა უკრაინის 39 წლის მოქალაქე, ანასტასია ბერეზოვსკაია მონაკოში ბიზნესმენზე განხორციელებული თავდასხმის გამო საერთაშორისო ძებნილად გამოაცხადა.

30 ივნისს მონაკოში მომხდარი აფეთქების შედეგად სამი ადამიანი დაშავდა. მათ შორის იყო უკრაინელი ბიზნესმენი ვადიმ ერმოლაევი, რომელიც კიევის მიერ სანქცირებულ პირთა სიაში ფიგურირებს.