მთავრობის ადმინისტრაციამ პარლამენტს საკანონმდებლო ინიციატივა წარუდგინა, რომელიც ცვლილებებს ითვალისწინებს „საჯარო დაწესებულებაში შრომის ანაზღაურების შესახებ” კანონში. ცვლილებებით, მინისტრების, ავტონომიური რესპუბლიკების მთავრობის წევრების, სახელმწიფო რწმუნებულებისა და მერების მოადგილეებს სახელფასო დანამატი და ფულადი ჯილდო ეკუთვნით.

მოქმედი კანონი სახელმწიფო-პოლიტიკური და პოლიტიკური თანამდებობის პირებს — მინისტრებს, მთავრობის წევრებს, რწმუნებულებს, მერებს და მათ მოადგილეებს — ამ სახის ანაზღაურებას კრძალავს. კანონის პროექტი ამ შეზღუდვას მოადგილეებისთვის მოხსნის.

პროექტით, სახელფასო დანამატი გაიცემა ზეგანაკვეთური სამუშაოს, დამატებითი ფუნქციების — მათ შორის ღამის სამუშაოს, დასვენება-უქმე დღისა და ჯანმრთელობისთვის რისკის შემცველი სამუშაო პირობების — სანაცვლოდ. ფულადი ჯილდო კი გაიცემა: განსაკუთრებული სირთულის დავალების შესრულებისთვის, ხანგრძლივი და კეთილსინდისიერი სამსახურისთვის, ან ჩადებული ფუნქციების სანიმუშო შესრულებისთვის.

ორივე სახის გასამრჯელო გაიცემა ზემდგომი თანამდებობის პირის გადაწყვეტილებით, კანონით დადგენილი ზღვრის და ბიუჯეტით გათვალისწინებული სახსრების ფარგლებში.

მთავრობის ადმინისტრაციის განმარტებით, ეს მოადგილეები „მნიშვნელოვან ფუნქციებს ასრულებენ”, ამიტომ „მათი მატერიალური სტიმულირება შრომის წახალისების ბერკეტი იქნება.”