სტრასბურგის სასამართლომ 19 მაისს გამოქვეყნებულ გადაწყვეტილებაში უარი თქვა გამოხატვის თავისუფლების დარღვევის დადგენაზე აქტივისტ ირაკლი მილაძის საქმეზე — „მილაძე საქართველოს წინააღმდეგ”. სარჩელი 2023 წლის ნოემბერში „საქართველოს ახალგაზრდა იურისტთა ასოციაციამ” (საია) შეიტანა.

სასამართლომ მიუთითა, რომ მოპასუხე სახელმწიფომ — საქართველომ — წარმოადგინა „შესაბამისი და საკმარისი” მიზეზები გამოხატვის თავისუფლებაში ჩარევისთვის. გადაწყვეტილებაში ჩამოთვლილია გათვალისწინებული გარემოებები: ვიდეოში „განსაკუთრებით აგრესიული ვულგარული ენა”, ახალგაზრდებისთვის განკუთვნილ TikTok-ზე ფართო გავრცელება, შიდა სასამართლოების სიღრმისეული განხილვა და დაკისრებული სანქციის შეზღუდული სიმკაცრე — სულ 500 ლარი (180 ევრო).

სასამართლომ ასევე ხაზი გაუსვა, რომ მილაძეს სისხლის სამართლის საქმე არ აღეძრა, თავისუფლების აღკვეთა არ შეეფარდა, ვიდეოს წაშლა არ მოეთხოვა და სანქციამ პოლიტიკური აქტივიზმი არ შეაფერხა.

„საია” გადაწყვეტილებას განმარტავს

გადაწყვეტილების შემდეგ საიამ განაცხადა, რომ სასამართლომ „მკაფიოდ განსაზღვრა ის სახელმძღვანელო სტანდარტი, რომელიც სულაც არ აძლევს საშუალებას შინაგან საქმეთა სამინისტროს, აწარმოოს თავისუფალი აზრის დევნის კოორდინირებული პრაქტიკა.”

საქმის ისტორია

2023 წლის თებერვალში თბილისის საქალაქო სასამართლომ მილაძე ადმინისტრაციული კოდექსის 166-ე (წვრილმანი ხულიგნობა) და 173-ე (პოლიციელის კანონიერი მოთხოვნისადმი დაუმორჩილებლობა) მუხლებით სამართალდამრღვევად ცნო. ჯარიმის ნაწილი — TikTok-ზე გამოქვეყნებული ვიდეოს გამო — ეფუძნებოდა სასამართლოს დასკვნას, რომ სოციალური ქსელი „საზოგადოებრივ სივრცედ” ითვლება და მომხმარებელი ვალდებულია, დაიცვას ეთიკისა და ზნეობის ნორმები.