საქართველოს შინაგან საქმეთა სამინისტრომ 8 ივნისს გამოაცხადა ახალი საკანონმდებლო ინიციატივები, რომლებიც სამი მთავარი მიმართულებით ამკაცრებს მიგრაციის მარეგულირებელ წესსებს.

საერთაშორისო სტუდენტები

ახლა გადაწყდა, რომ უმაღლეს ან პროფესიულ საგანმანათლებლო დაწესებულებაში უცხოელი სტუდენტების ჩარიცხვა ახალ წინაპირობებს დაექვემდებარება: ენის საერთაშორისო სერტიფიკატის წარდგენა ან NAEC-ის ორგანიზებული უცხო ენის/სახელმწიფო ენის გამოცდის ჩაბარება. მთავრობის დადგენილებით თითოეულ დაწესებულებაზე უცხოელ სტუდენტთა მაქსიმალური კვოტაც დაწესდება.

დაწესებულებები ვალდებული გახდებიან ერთიან საინფორმაციო სისტემაში ასახონ ჩარიცხვის, სტატუსის შეცვლისა და სწავლის დასრულების შესახებ ინფორმაცია. ახალი ადმინისტრაციული სანქციები შეიძლება ჯარიმა ან უცხოელი სტუდენტების მიღების შეზღუდვა-ავტორიზაციის გაუქმება იყოს.

ფიქციური ქორწინება

ახალი კანონის მიხედვით, სისხლის სამართლის წესით დასჯადი ხდება საქართველოს მოქალაქისა და უცხოელის ფიქციური ქორწინება, თუ მისი მიზანი მოქალაქეობის, ბინადრობის ნებართვის ან სხვა სამართლებრივი საფუძვლის მოპოვებაა. სასჯელის სახით გათვალისწინებულია:

• უცხოელის საქართველოდან გაძევება და შემოსვლის 2–10 წლით აკრძალვა
• ან ფინანსური ჯარიმა
• ან 1–2-წლიანი შინაპატიმრობა
• ან 2 წლამდე თავისუფლების აღკვეთა

ქორწინების ნამდვილობის შემოწმებისთვის შეიქმნება სპეციალური კომისია, ხოლო ქორწინების საფუძველზე ბინადრობის ნებართვა ბრალდებული სქემის გამო გაიცემა მხოლოდ კომისიური შემოწმების შემდეგ.

მიგრაციის დეპარტამენტი

შსს-ის მიგრაციის დეპარტამენტს მიენიჭება ოპერატიულ-სამძებრო ღონისძიებების განხორციელების უფლებამოსილება. ამასთან, უცხოელ მსჯავრდებულებს სასჯელის მოუხდელი ნაწილი შეიძლება საქართველოდან გაძევებით და ქვეყანაში შემოსვლის აკრძალვით შეიცვალოს.

შსს-ის განცხადებით, ცვლილებები „პასუხობს თანამედროვე მიგრაციულ გამოწვევებს და ხელს შეუწყობს უცხოელთა საქართველოში ყოფნის რეგულირების უფრო ეფექტიანი, გამჭვირვალე და უსაფრთხო სისტემის ჩამოყალიბებას”.