საქართველოს საგარეო საქმეთა სამინისტრო ავლაბარის ყოფილ საპრეზიდენტო სასახლეში გადასახლდა — შენობა მარტიდან ფუნქციონირებს. მთავრობის ადმინისტრაციის პრესსამსახურმა ეს ინფორმაცია 2 ივნისს „ნეტგაზეთსა” და „BM.ge”-ს დაუდასტურა.

სამინისტრო ადრე ორი თბილისური შენობიდან მუშაობდა: ძველი ოფისი მთაწმინდაზე, შიო ჩიტაძის ქუჩაზე, და ახალი შენობა გიორგი ლეონიძის ქუჩაზე, სადაც 2023 წელს ძირითადი სტრუქტურები გადავიდა. ლეონიძის ქუჩის შენობაში საკონსულო და ადმინისტრაციული დეპარტამენტები კვლავ გააგრძელებენ მუშაობას.

ავლაბრის რეზიდენცია მიხეილ სააკაშვილის პრეზიდენტობის პერიოდში აიგო. „ერთიანი ნაციონალური მოძრაობის” ხელისუფლებიდან წასვლის შემდეგ შენობამ პირვანდელი დანიშნულება დაკარგა და 2019 წლიდან „სახელმწიფო ცერემონიების სასახლე” ეწოდა. გიორგი მარგველაშვილი — მიუხედავად ათონელის სასახლეში გადასვლის წინასაარჩევნო პირობისა — ავლაბარში მუშაობდა, რამაც ბიძინა ივანიშვილის კრიტიკა გამოიწვია. სალომე ზურაბიშვილმა 2018 წელს ათონელის სასახლეში მოაწყო სამუშაო ადგილი; ამჟამინდელი პრეზიდენტი მიხეილ ყაველაშვილიც ათონელის რეზიდენციიდან მუშაობს.

„სამოქალაქო საქართველო” გადასვლის დეტალებზე საგარეო საქმეთა სამინისტროს კომენტარს ელოდება.