Meta-მ „სამუშაო ძალის აკადემია” (America’s Workforce Academy) დააფუძნა — ხუთკვირიანი, უფასო სასწავლო პროგრამა, რომელიც ამერიკელებს მონაცემთა ცენტრების მშენებლობისთვის ამზადებს. პროგრამა CBRE-სა და Associated Builders and Contractors-თან პარტნიორობით მიმდინარეობს; კურსდამთავრებულებს Meta-ს ობიექტებზე სამუშაო ადგილი ეთავაზებათ.

მიმდინარე წელს საპილოტე ეტაპზე Meta 115 მილიონ დოლარს ჩადებს; პროგრამა ლუიზიანაში, ოჰაიოში, ინდიანასა და ტეხასში გაეშვება. კომპანიის უმსხვილეს მონაცემთა ცენტრს, „Hyperion”-ს, ლუიზიანის Richland Parish-ში განათავსებენ. Meta-ს განცხადებით, ის „იმდენად დიდი იქნება, რომ მანჰეტენის მნიშვნელოვან ნაწილს მოიცავს”.

„ამერიკას ასობით ათასი კვალიფიციური სპეციალისტი დასჭირდება, რათა ააშენოს ინფრასტრუქტურა, რომელიც ქვეყანას AI-ში ლიდერობის საშუალებას მისცემს. დღეს ვუშვებთ America’s Workforce Academy-ს — უფასო სწავლებისა და ამ ინფრასტრუქტურის მშენებლობაში დასაქმებამდე პირდაპირი გზის უზრუნველყოფის მიზნით. გვინდა, რაც შეიძლება მეტი ადამიანი დაგვეხმაროს ამ მომავლის შექმნაში”, — დაწერა ფეისბუქზე Meta-ს დამფუძნებელმა, მარკ ზაკერბერგმა.

Meta შეუერთდა კომპანიათა მზარდ ჯგუფს, რომლებმაც სამუშაო ძალის დეფიციტი გათვიცნობიერეს და კადრებს საკუთარი ინიციატივით ამზადებენ. მონაცემთა ცენტრების სწრაფი ზრდა განსაკუთრებით ელექტრიკოსებსა და HVAC-ტექნიკოსებზე მოთხოვნას ზრდის. Associated Builders and Contractors-ის შეფასებით, სამშენებლო ინდუსტრიას მხოლოდ ამ წელს დაახლოებით 349 000 ახალი მუშახელი სჭირდება.

მაღალი მოთხოვნა ბევრი ჩვეულებრივი მუშისთვის კეთილდღეობის წყაროდ იქცა — ათასობით დროებითი სამშენებლო სამუშაო ჩნდება, მათ შორის პროვინციულ რეგიონებშიც. თუმცა კითხვა ღია რჩება: პროექტების დასრულების შემდეგ ამოქმედებული მონაცემთა ცენტრი გაცილებით ნაკლებ თანამშრომელს საჭიროებს.

Meta ამჟამად ასობით მილიარდ დოლარს ხარჯავს AI ინფრასტრუქტურის განვითარებაზე. ამ ხარჯების ნაწილობრივ დასაფინანსებლად კომპანიამ ახლახან 8 000 ოფისის თანამშრომელი გაათავისუფლა. კომპანიის გეგმაა, 3,5 მილიარდი მომხმარებლისთვის AI-ასისტენტ-აგენტები შეიმუშაოს. აპრილში Meta-მ ოპტიკური ბოჭკოს მონტაჟის სასწავლო პროგრამა გამოაცხადა, რომელსაც პირველ შვიდ დღეში 35 000 განაცხადი მოჰყვა.