შინაგან საქმეთა სამინისტრომ 4 ივნისს განაცხადა, რომ სამეგრელო-ზემო სვანეთის პოლიციის დეპარტამენტის თანამშრომლებმა მესტიის მუნიციპალიტეტში ელექტროენერგიის კანონსაწინააღმდეგო მოხმარების ფაქტებზე გამოძიება დაიწყეს და 6 სხვადასხვა ლოკაციაზე 148 კრიპტოვალუტის მაინერი ამოიღეს.

გამოძიებით დადგინდა, რომ მოქალაქეები ამ მოწყობილობებით სისტემატურად ახდენდნენ ციფრული ვალუტის გენერირებას, ელექტროენერგიას კი უკანონოდ და მართლსაწინააღმდეგოდ ხმარობდნენ. გამოძიება სისხლის სამართლის კოდექსის 229-ე პრიმა მუხლის მე-2 ნაწილით მიმდინარეობს, რაც 3 წლამდე პატიმრობას ითვალისწინებს.

პრემიერ-მინისტრ ირაკლი კობახიძის განცხადებით, „ქართველი ხალხის ძალის” პარტიის წევრ ვიქტორ ჯაფარიძესთან და სვანეთის სხვა დეპუტატებთან ერთად მათ ერთობლივი გადაწყვეტილება მიიღეს — მაინინგის წინააღმდეგ გადამჭრელი ზომები გაატარონ. „ჭორებით საუბარია არასწორია. ვიცით, რომ არსებობს პრობლემა”, — განაცხადა კობახიძემ. პრემიერის სიტყვით, მესტიაში ელექტროენერგიის წლიური მოხმარება 133 მილიონ კვტ.სთ-ს შეადგენს, ანუ მსგავს მუნიციპალიტეტებთან შედარებით — სადაც ორნიშნა მაჩვენებელიც კი არ ფიქსირდება — ანომალიურად მაღალია.

ენერგეტიკისა და წყალმომარაგების მარეგულირებელი ეროვნული კომისიის (სემეკი) წევრმა გივი სანიკიძემ ინიციატივა „ცალსახად სწორად” შეაფასა. მისი განმარტებით, გამრიცხველიანება ხელს შეუწყობს ელექტროენერგიის მოხმარების შემცირებას, ქსელზე ზეწოლის შემსუბუქებასა და ადგილობრივი ინფრასტრუქტურის რეაბილიტაციას.

civil.ge-ს ცნობით, 2025 წელს მესტიაში ენერგომოხმარება 2020 წელთან შედარებით 46%-ით გაიზარდა — 91-დან 133 მილიონ კვტ.სთ-მდე. 2026 წლის დასაწყისში მერიამ ეს ვითარება „უკიდურეს გამწვავებად” შეაფასა.