51 წევრისგან შემდგარი მედიის თავისუფლების კოალიციის (MFC) თანათავმჯდომარეებმა — დიდმა ბრიტანეთმა და ფინეთმა — მედიის თავისუფლების მსოფლიო დღისადმი მიძღვნილ ერთობლივ მოსაზრებაში საქართველოს მედიაგარემოში „შემაშფოთებელ ტენდენციებზე” გაამახვილეს ყურადღება. მოსაზრებას 14 სხვა სახელმწიფომაც დაუჭირა მხარი: ავსტრიამ, ბელგიამ, დანიამ, ესტონეთმა, გერმანიამ, ისლანდიამ, ირლანდიამ, ლატვიამ, ლიეტუვამ, ლუქსემბურგმა, ნიდერლანდებმა, ნორვეგიამ, პოლონეთმა და შვედეთმა.

„რეპორტიორები საზღვრებს გარეშეს” (RSF) მონაცემებზე დაყრდნობით, კოალიცია აღნიშნავს, რომ პრესის თავისუფლების რეიტინგში საქართველო 2022 წლის 77-ე ადგილიდან 2026 წელს 135-ე ადგილს დაეცა — „სერიოზული უკუსვლა”. RSF საქართველოს მედიაგარემოს „რთულად” აფასებს.

„დოკუმენტირებულია სულ მცირე 50 ჟურნალისტი, რომლებიც დემონსტრაციების დროს დაშავდნენ, სცემეს, დააკავეს ან ხელი შეეშალათ მოვალეობის შესრულებაში. ეს თავდასხმები მიუღებელია. ჟურნალისტებს უნდა ჰქონდეთ თავისუფლად გამოძიებისა და ხელისუფლების მოქმედებების კითხვის ნიშნის ქვეშ დაყენების შესაძლებლობა”, — ნათქვამია მოსაზრებაში.

კოალიცია ასევე მიუთითებს ეუთო-ს მოსკოვის მექანიზმის ანგარიშზე, რომელიც „ხაზს უსვამს ძალადობის სისტემურ ხასიათს 2024–2025 წლებში გამართული საპროტესტო აქციების დროს, მათ შორის ჟურნალისტების წინააღმდეგ განხორციელებულ ძალადობას.” ევროპის საბჭოს ადამიანის უფლებათა კომისარიც მიუთითებს გადამეტებული ძალის გამოყენებასა და ანგარიშვალდებულების ნაკლებობაზე.

ცალკე გამოყოფილია ჟურნალისტ მზია ამაღლობელის საქმე: „მისი დაკავება, მოპყრობა და დაპატიმრება საერთაშორისო დონეზე დაგმობილ იქნა, როგორც უსამართლო და პოლიტიკურად მოტივირებული.” კოალიცია კვლავ ითხოვს ამაღლობელის განთავისუფლებას.