სახელმწიფო მინისტრმა მამუკა მდინარაძემ სახელმწიფო უსაფრთხოების სამსახურს (სუს) მოუწოდა, „უახლოეს საათებში” გამოაქვეყნოს ვიდეო ჩანაწერი, რომელიც ევროპული სახელმწიფოს სასარგებლოდ ჯაშუშობის ბრალდებით დაკავებულ გიორგი უძილაურს ეხება.

„ვთხოვ, რომ გამოქვეყნდეს: პირველი — როგორ იღებს კონკრეტული ადამიანი დირექტივებს; მეორე — როგორ გადასცემენ მას კონვერტით თანხას; მესამე — როგორ აწერს ხელს შესაბამის უწყისს. ეს სამი ეპიზოდი ნათლად ადასტურებს ბრალდების საფუძვლიანობას,” — განაცხადა მდინარაძემ.

მინისტრმა ახსნა, რომ საქმის სხვა ნაწილი კვლავ კლასიფიცირებული დარჩება, რადგან მისი გასაჯაროება გამოძიებას ზიანს მიაყენებდა. „ერთ ადამიანსაც კი არ უნდა მიეცეს სპეკულაციის საშუალება,” — დასძინა მდინარაძემ.

სუს-ი ამბობს, რომ უძილაური „უცხო ქვეყნის სპეცსამსახურების ინტერესების სასარგებლოდ სისტემატურად ახორციელებდა ინფორმაციის მოპოვებასა და გადაცემას.” ის ფინანსთა სამინისტროს საგამოძიებო სამსახურის ერთ-ერთი სამმართველოს უფროსი იყო, ხოლო ადრე — „ქართუ ჯგუფის” PR სამსახურის ხელმძღვანელი.