15 ივნისს ნორვეგიის ტახტის მემკვიდრე პრინცესა მეტე-მარიტის უფროს ვაჟს, მარიუს ბორგ ჰოიბის, გაუპატიურების ორ ეპიზოდსა და 32 სხვა სამართალდარღვევაში ბრალდებულად ცნობის შემდეგ, ოთხი წლით თავისუფლების აღკვეთა მიესაჯა. ჰოიბი, ასევე დამნაშავედ ცნეს ფიზიკურ შეურაცხყოფასა და ძალადობის ეპიზოდებშიც. პატიმრობასთან ერთად, სასამართლომ მას დაზარალებულებისთვის კომპენსაციის გადახდაც დააკისრა.

29 წლის ჰოიბის ბრალად ედებოდა 2018-2024 წლებში ოთხ ქალზე სექსუალური ძალადობა, რომლებიც დანაშაულის ჩადენის მომენტში გონებადაკარგულები იყვნენ ან სხვა მიზეზით ვერ უწევდნენ წინააღმდეგობას. საერთო ჯამში, მას 40 სისხლისსამართლებრივი ბრალდება ჰქონდა წარდგენილი, რომელთა შორის შედარებით მსუბუქი სამართალდარღვევებიც იყო, ისეთები როგორიცაა: ფიზიკური შეურაცხყოფა, ნარკოტიკებთან დაკავშირებული დანაშაული და შემაკავებელი ორდერის დარღვევა. ჰოიბი უარყოფდა გაუპატიურების ბრალდებებს, თუმცა აღიარებდა რამდენიმე შედარებით მსუბუქ დანაშაულს. პროკურატურა ოსლოს საქალაქო სასამართლოსგან მისთვის 7 წლითა და 7 თვით პატიმრობას ითხოვდა, ხოლო დაცვის მხარე მიიჩნევდა, რომ იგი გაუპატიურების მუხლებით უნდა გამართლებულიყო და იმ დანაშაულებისთვის, რომლებიც თავადვე აღიარა, არაუმეტეს 18 თვის ვადით თავისუფლების აღკვეთა შეჰფარდებოდა. განაჩენი საბოლოო არ არის და ჰოიბის მისი გასაჩივრება შეუძლია. სასამართლო პროცესის პარალელურად, მკვეთრად გაუარესდა მეტე-მარიტის ჯანმრთელობის მდგომარეობა.პრინცესა, რომელსაც ფილტვის ფიბროზი აქვს ფილტვის გადანერგვას ელოდება, კრიტიკის სამიზნე გარდაცვლილ სექსუალურ დამნაშავესთან, ჯეფრი ეპშტეინთან მისი კონტაქტების გამოც აღმოჩნდა. მან საჯაროდ მოიხადა ბოდიში ამ კავშირის გამო და აღნიშნა, რომ თავის დროზე ეპშტეინთან ურთიერთობის გაგრძელებით არასწორი გადაწყვეტილება მიიღო. წყარო