კატალონიის პოლიციამ ბარსელონაში დააკავა 45 წლის ჯონათან ანდიკი — მოდის ბრენდ „Mango”-ს დამფუძნებლის ვაჟი — მამის შესაძლო მკვლელობაში ეჭვმიტანილობით. გამოძიება მკვლელობის მუხლით მიმდინარეობს.

„Mango”-ს დამფუძნებელი, 71 წლის ისაკ ანდიკი, 2024 წლის დეკემბერში ბარსელონასთან ახლოს, მონსერატის კლდოვანი ბილიკების ტერიტორიაზე 100 მეტრზე მეტი სიმაღლიდან გადავარდა და დაიღუპა. ინციდენტის დროს ის შვილთან ერთად ლაშქრობაში იმყოფებოდა. ხელისუფლებამ სიკვდილი თავდაპირველად უბედურ შემთხვევად შეაფასა.

ერთ წელზე მეტის შემდეგ, ადგილობრივ მედიაში გავრცელდა ინფორმაცია, რომ ჯონათან ანდიკის ჩვენება — ის ინციდენტის ერთადერთი მოწმეა — შესაძლოა, სასამართლო-სამედიცინო ექსპერტიზის მტკიცებულებებთან წინააღმდეგობაში მოდის. მან პოლიციას უამბო, რომ „ლეს ფეიხადეს” ბილიკზე მამაზე ოდნავ წინ მიდიოდა, ქვების ხმა გაიგო, მიხედა და დაინახა, თუ როგორ ვარდებოდა მამამისი. ეს კლდოვანი მარშრუტი ოჯახური სეირნობისთვის პოპულარულია და ოფიციალურად „განსაკუთრებით სახიფათოდ” არ ითვლება.

45 წლის ჯონათანმა მამის გარდაცვალების შემდეგ „Mango”-ს გლობალური ბიზნესი და-ების თანხლებით ჩაიბარა. ისაკ ანდიკი სიკვდილის მომენტისთვის ესპანეთის ერთ-ერთ ყველაზე მდიდარ ადამიანად ითვლებოდა — მისი ქონება 4,5 მილიარდ დოლარად იყო შეფასებული. ბრენდი „Mango” 1984 წელს დაარსდა.