მაშველებმა მალდივის „ზვიგენების გამოქვაბულიდან” 5 დაღუპული იტალიელი ტურისტის ცხედრებზე დამაგრებული ვიდეოკამერები ამოიღეს. ექსპერტები იმედოვნებენ, რომ კადრების გაშიფვრა ბოლოს გააშუქებს, თუ რა გახდა ელიტარული მყვინთავების სიკვდილის მიზეზი.

ინდოეთის ოკეანეში, ზვიგენებით სავსე წყლებში, ფინელი პროფესიონალი მყვინთავების ჩართვით ჩატარდა ძიების ოპერაცია. ჯამში ხუთივე ცხედარი ამოიყვანეს: ჯგუფის ხელმძღვანელი — გამოცდილი ინსტრუქტორი და კატარღის კაპიტანი ჯანლუკა ბენედეტი პირველი იყო, ვისი ცხედარიც ნაპოვნი. ბოლო ეტაპზე კი ზედაპირზე ამოიყვანეს 22 წლის ჯორჯია სომაკალი და 31 წლის მკვლევარი მურიელ ოდენინო.

ტრაგედიის სავარაუდო მიზეზი

სპეციალისტები ვარაუდობენ, რომ გამოქვაბულის ვიწრო ლაბირინთებში მძლავრი დინება წარმოიქმნა. წყლის წნევის მკვეთრი ვარდნა ვაკუუმს ქმნიდა, საიდანაც მყვინთავები ვერ გამოდიოდნენ, სანამ ჟანგბადი ამოიწურა.

„აქ ორი სცენარია: ან დინებამ ერთდროულად ყველა ჩაითრია, ან ერთ-ერთი მათგანი მახეში აღმოჩნდა და დანარჩენები მის გადარჩენას შეეწირნენ,” — განაცხადა იტალიის წყალქვეშა და ჰიპერბარიული მედიცინის საზოგადოების პრეზიდენტმა ალფონსო ბოლონინმა.

სამძებრო ოპერაციას კიდევ ერთი მსხვერპლი მოჰყვა: მალდივის სამხედრო-საზღვაო ძალების მყვინთავი მუჰამედ მაჰუდჰი, რომელიც იტალიელებს ეძებდა, ზედაპირზე ამოსვლისას დეკომპრესიული დაავადებით გარდაიცვალა. ტრაგედიის მსხვერპლთა საერთო რაოდენობა ამგვარად 6-მდე გაიზარდა.

დაღუპული მონიკა მონტეფალკონეს ქმარმა, კარლო სომაკალმა, განაცხადა, რომ მისი მეუღლე მსოფლიოში ერთ-ერთი საუკეთესო მყვინთავი იყო: „იქ, სიღრმეში, რაღაც გაუთვალისწინებელი მოხდა. შესაძლოა, ტექნიკური გაუმართაობა იყო — დარწმუნებული ვარ, წესებს არ დაარღვევდნენ.” რომის პროკურატურამ გაუფრთხილებლობით სიცოცხლის მოსპობის მუხლით გამოძიება დაიწყო.