ჰადსონის ინსტიტუტის მკვლევარმა ლუკ კოფიმ საქართველოსთან დაკავშირებულ დებატებზე ქართულ ოცნებას ბრალი დააბა, რომ ირანს ქვეყანაში თავისუფლად მოქმედების ნებართვა მისცა.

„ოცნება ნებას რთავს ირანს, საქართველოში გააგრძელოს ის, რასაც აკეთებს. ეს სრულიად ეწინააღმდეგება პრეზიდენტ ტრამპის მსოფლმხედველობასა და „ამერიკა პირველი” პოლიტიკას,” — განაცხადა კოფიმ.

განსაკუთრებული ყურადღება მან ალ მუსტაფას უნივერსიტეტზე გაამახვილა, რომელიც ტრამპის პირველი პრეზიდენტობის დროს სანქციებს ექვემდებარებოდა, მაგრამ საქართველოში დღემდე ფუნქციონირებს. „ინსტაგრამზე შეხვიდეთ და ნახავთ, სად მართავს ეს უნივერსიტეტი ღონისძიებებს — ეს აბსურდულია. ქართული ოცნება ამ საკითხს სერიოზულად არ უდგება,” — დასძინა მკვლევარმა.

კოფის განცხადებით, ქართულ ოცნებას სწორი სიგნალების გაგზავნის შესაძლებლობა ჯერ კიდევ აქვს: „ბურთი ახლა მათ მოედანზეა. მაგრამ ჯერ უნდა დაიმტკიცონ, რომ ოდესღაც ამერიკის პარტნიორები იყვნენ. ქართულ ოცნებას შეუძლია, ტრამპის ადმინისტრაციას სწორი სიგნალები მისცეს — რომ ირანის საკითხს სერიოზულად მიუდგება. მაგრამ ამისთვის, პირველ რიგში, ზოგიერთი ამ ქსელის წინააღმდეგ თვალსაჩინო, მკაცრი ნაბიჯები სჭირდება.”