“კიოლნის” პრესსამსახურმა ინტერვიუ ჩაწერა ლუკა ლოჩოშვილთან, რომელმაც ორიოდე დღის წინ ტრადიციულ ბუნდესლიგურ კლუბთან 3-წლიანი კონტრაქტი გააფრომა და მესამე ქართველი ფეხბურთელი გახდა რევაზ და არჩილ არველაძეების შემდეგ, რომელიც “თხების” ფორმას მოირგებს.

“ჯვაროსნების” მცველი ინტერვიუში საუბრობს საერთაშორისო გამოცდილებაზე, თავის სათამაშო სტილზე და იმაზე, რაც უკვე სმენია “კიოლნისა” და მისი გულშემატკივრების შესახებ…

-ლუკა, კეთილი იყოს შენი მობრძანება “კიოლნში”. როგორ გრძნობ თავს გარემოს ცვლილების შემდეგ?

• თავს კარგად ვგრძნობ და ძალიან პოზიტიური განწყობა მაქვს. აღფრთოვანებული ვარ ცვლილებით და მოუთმენლად ველი ახალ გამოწვევას.

-გასულ სეზონში, მეორე ბუნდესლიგაში, “ნიურნბერგის” მაისურით 33 მატჩი ჩაატარე და მხოლოდ ერთი გამოტოვე. საიდან მოდის ეს ენერგია?

• ყოველთვის ვცდილობ, საუკეთესო ფიზიკურ ფორმაში ვიყო. ამის მისაღწევად, ყოველდღიურად ვმუშაობ გუნდთანაც და ინდივიდუალურადაც. სწორედ ამიტომ შემიძლია მთელი სეზონის თამაში და ასეც მინდა გავაგრძელო.

-როგორ დაახასიათებდით თქვენს სათამაშო სტილს?

• აგრესიული მოთამაშე ვარ და მსიამოვნებს ერთი-ერთზე ორთაბრძოლები. მაგრამ ასევე მსიამოვნებს ბურთით თამაში და დრიბლინგიც. უპირველეს ყოვლისა, თავს კომფორტულად ვგრძნობ ორთაბრძოლებსა და დაცვაში.

-დაცვითი თვისებების გარდა, არსანიშნავია, რომ გასულ სეზონში 5 გოლიც გაიტანეთ. რას უნდა ელოდონ გულშემატკივრები?

• კარგი სეზონი იყო და მჯერა, ჩემი სიმაღლის გამო, სტანდარტული სიტუაციების დროს შეტევაშიც სახიფათოდ შემიძლია ჩავერთო. იმედი მაქვს, ამას “კიოლნშიც” შევძლებ. ყველაფერს გავაკეთებ, რომ გულშემატკივრებმა და კლუბმა ჩემით იამაყონ.

-როგორც საქართველოს ნაკრების ფეხბურთელმა, თქვენ “რაინ-ენერგი-შტადიონზე” ევროპის 2024 წლის ევროპის ჩემპიონატის დროს ითამაშეთ. როგორი მოგონებები გაქვთ?

• ძალიან კარგი იყო, რადგან ევროპის ჩემპიონატის მერვედფინალში ვიყავით გასულები. ასევე, თავად სტადიონიც განსაკუთრებულად დამამახსოვრდა. ახლა ჩვენი გულშემატკივრების წინაშე თამაშს მოუთმენლად ველი.

-ანუ, სტადიონმაც ხომ არ იქონია გავლენა თქვენს გადაწყვეტილებაზე, რომ “კიოლნში” გადმოსულიყავით?

• მართალს ამბობთ! ბევრი რამ მსმენია გულშემატკივრებზე, სტადიონზე და ქალაქზე - რამდენად უყვართ აქაურ ხალხს ფეხბურთი. ეს ყველა ფეხბურთელისთვის მნიშვნელოვანია და ერთ-ერთი მთავარი მიზეზია, რის გამოც “კიოლნი” ავირჩიე. მინდა გულშემატკივრებს ვაჩვენო, რომ აქ ვარ და ყოველთვის მაქსიმუმს გავაკეთებ.

-კარიერის განმავლობაში რამდენიმე ქვეყანაში გითამაშიათ. ამან თქვენზე როგორ იმოქმედა?

• რა თქმა უნდა, ყველა ქვეყანას განსხვავებული კულტურა და ფეხბურთის საკუთარი სტილი აქვს. მე ავსტრიასა და იტალიაში ვთამაშობდი - ორ, სრულიად განსხვავებულ ლიგაში. გერმანული ფეხბურთი ძალისმიერი, დაძაბულია და ეს მომწონს. თამაშის გერმანული სტილით თავს ძალიან კომფორტულად ვგრძნობ.

-მეორიდან პირველ ბუნდესლიგაში გადასული რისთვის ემზადებით?

• მოუთმენლად ველი სეზონის დაწყებას. მსიამოვნებს ძლიერ მეტოქეებთან კონკურენცია. რაც უფრო ძლიერია მოწინააღმდეგე, მით უფრო მეტი მოტივაცია მიჩნდება.

-როგორ დაგახასიათებენ თქვენი თანაგუნდელები, როგორც მოთამაშესა და როგორც ადამიანს?

• ვფიქრობ, ისინი იტყვიან, რომ კარგი და ძალიან თავმდაბალი ადამიანი ვარ. მაგრამ მოედანზე ლიდერიც გახლავართ, მიყვარს აგრესიული თამაში და ძლიერი ფსიქიკაც მაქვს.