1 ივლისს ევროკომისიის პრეზიდენტი, ურსულა ფონ დერ ლაიენი ბაქოში აზერბაიჯანის პრეზიდენტ ილჰამ ალიევს შეხვდა და სამხრეთ კავკასიაში დაკავშირებადობის, მშვიდობისა და ენერგეტიკის მიმართულებით ევროკავშირის ახალი ინვესტიციები წარადგინა.

ფონ დერ ლაიენმა ალიევს სომხეთთან მიღწეული ისტორიული სამშვიდობო შეთანხმება კიდევ ერთხელ მიულოცა. მისი თქმით, ევროკავშირი მტკიცედ უჭერს მხარს ამ პროცესს და მზად არის ორივე მხარეს დაეხმაროს, რათა “ქაღალდზე არსებული მშვიდობა რეალურ მშვიდობად იქცეს”.

ევროკავშირის პროგრამა Global Gateway-ის ფარგლებში მან სამხრეთ კავკასიაში სატრანსპორტო, ენერგეტიკული და ციფრული დაკავშირებადობის პროექტებისთვის 200 მილიონ ევრომდე გრანტის გამოყოფა გამოაცხადა. მისი თქმით, ამ დაფინანსებას შეუძლია დამატებით 2 მილიარდ ევრომდე საჯარო და კერძო ინვესტიციის მობილიზება. დასახელებულ პროექტებს შორის იყო ნახიჩევანის გავლით სარკინიგზო კავშირის განვითარება და ბაქოს პორტის გაფართოება.

ფონ დერ ლაიენმა ასევე წარადგინა ევროკავშირი-აზერბაიჯანის დაკავშირებადობის ახალი პარტნიორობის ინიციატივა, რომელიც დაკავშირებადობის საკითხებზე მაღალი დონის დიალოგის დაწყებასა და ბაქოში რეგიონული საინვესტიციო კონფერენციის ჩატარებას მოიცავს.

მეორე ინიციატივის ფარგლებში გამოცხადდა 20 მილიონი ევროს ღირებულების პროგრამა, რომელიც მიზნად აზერბაიჯანის სასაზღვრო რეგიონებში მშვიდობის განმტკიცებას ისახავს. პროგრამა დააფინანსებს ჯანდაცვისა და სასწრაფო დახმარების სერვისებს, განაღმვით სამუშაოებს, ასევე ადგილობრივი ეკონომიკის განვითარებას სოფლის მეურნეობის, წყლის რესურსების მართვის, ზუსტი მიწათმოქმედებისა და მცირე ბიზნესის მხარდაჭერის გზით.

ენერგეტიკის საკითხზე ფონ დერ ლაიენმა აზერბაიჯანს მადლობა გადაუხადა იმისთვის, რომ რუსეთიდან ევროპისთვის გაზის მიწოდების შემცირების შემდეგ ბაქომ ენერგომომარაგება გაზარდა. მან სამხრეთის გაზის დერეფანს “გამორჩეული წარმატების შემთხვევა” უწოდა. ლაიენი ასევე მიესალმა აზერბაიჯანის გეგმებს ოფშორული ქარის ენერგიის განვითარების, ევროკავშირისკენ “მწვანე ენერგიის დერეფნის” შექმნისა და სომხეთთან ელექტროგადამცემი კაბელის პროექტის შესახებ.

ევროკომისიის პრეზიდენტის თქმით, ევროკავშირს სურს კიდევ უფრო გააღრმაოს ეკონომიკური პარტნიორობა აზერბაიჯანთან, რომელიც მისი უდიდესი სავაჭრო პარტნიორი და ყველაზე მსხვილი ინვესტორია. მან აღნიშნა, რომ ახალი ყოვლისმომცველი შეთანხმების შესახებ მოლაპარაკებების განახლება მნიშვნელოვანი ნაბიჯია სავაჭრო ურთიერთობების გაფართოებისკენ.