24 მაისის ღამეს რუსეთმა კიევზე განახორციელა სრულმასშტაბიანი ომის ერთ-ერთი ყველაზე მასშტაბური შეტევა — 90 სხვადასხვა სახის რაკეტა და 600 დრონი. პირველად ამ ომში გამოყენებულ იქნა „ორეშნიკი” — საშუალო სიშორის ბალისტიკური რაკეტა — ბილა ცერკვის წინააღმდეგ.

4 ადამიანი დაიღუპა, 100-ზე მეტი დაშავდა. კიევის მერ ვიტალი კლიჩკოს განცხადებით, კიევში ცალკე 81 ადამიანი დაშავდა, მათ შორის სამი ბავშვი.

განადგურებული ობიექტები:

• მეტროსადგური „ლუკიანივსკა” და მომიჯნავე სავაჭრო ცენტრი „კვადრატი” — სრულად განადგურდა;
• ლუკიანივსკის სასურსათო ბაზარი;
• უკრაინის საგარეო საქმეთა სამინისტროს შენობა;
• ეროვნული ფილარმონია, ეროვნული მუსიკალური აკადემია, ეროვნული ბიბლიოთეკა;
• კიევის საოპერო თეატრი (კიევის ოპერა);
• ეროვნული სამხატვრო მუზეუმი, ჩერნობილის ეროვნული მუზეუმი;
• ეკლესიები, სკოლები, საერთო საცხოვრებლები, 30-ზე მეტი საბინაო კორპუსი.

გამოყენებული იარაღი: 1 „ორეშნიკი”, 2 „კინჟალი”, 3 „ცირკონი”, 30 „ისკანდერ-M/С-400”, 54 ფრთოსანი რაკეტა, 600 მოიერიშე დრონი. უკრაინის საჰაერო თავდაცვამ 604 სამიზნე გაანეიტრალა.

პრეზიდენტი ზელენსკი ამბობს: „პუტინს „ურა”-ც კი ნორმალურად ვეღარ წარმოთქვამს, მაგრამ კვლავ საცხოვრებელ სახლებს ანადგურებს.” ზელენსკიმ პარტნიორებს დახმარების გაძლიერებისკენ მოუწოდა, საფრანგეთმა კი შეტევა „რუსული ესკალაციის” ახალ ეტაპად შეაფასა.

კიევის ოლქის ბუჩასა და ობუხოვის რაიონებში კიდევ 2 ადამიანი დაიღუპა. ხარკოვის ოლქის ქ. ბოგოდუხოვშიც 12 ადამიანი დაშავდა.