საქართველოს პროკურატურამ, ამერიკის შეერთებული შტატების საიდუმლო სამსახურთან, პოლონეთის კიბერდანაშაულთან ბრძოლის ცენტრალურ ბიუროსთან, ევროჯასტთან და ევროპოლთან ერთობლივი ოპერაციის ფარგლებში, 10 ივნისს „AudiA6” ორგანიზებული ჯგუფის ორი უცხოელი წევრი დააკავა. ოპერაცია საქართველოს ტერიტორიაზე ათეულობით ლოკაციაზე ჩატარდა.

საქართველოს პროკურატურის საგამოძიებო დეპარტამენტის უფროსის მოადგილე ბექა კვიციანი განმარტავს, რომ „AudiA6” 2022 წლიდან ფუნქციონირებდა და კიბერდამნაშავეებისთვის სახსრების გათეთრებასა და დანაშაულის კვალის სამართალდამცავებისგან დამალვას უზრუნველყოფდა. ჯგუფი ასევე მართავდა „Dark2Web” კიბერკრიმინალურ ფორუმს. 2022-2025 წლებში ჯგუფის გავლით გათეთრებული კრიპტოვალუტის ოდენობა „რამდენიმე ასეული მილიონი აშშ დოლარით” იზომება.

ოპერაციაში 100-ზე მეტი სამართალდამცავი მონაწილეობდა. ყადაღა დაედო 173 სატრანსპორტო საშუალებას, ძვირადღირებულ უძრავ ქონებასა და საბანკო ანგარიშებს. ამოღებული იქნა „ელექტრონული მტკიცებულებები და დოკუმენტაცია”.

ოპერაცია 11 ივნისს ბრიფინგით გათავდა, სადაც საქართველოს, ამერიკის და პოლონეთის ოფიციალური პირები ერთობლივად გამოვიდნენ.