გორის „დილის” ახალმა მთავარმა მწვრთნელმა ლევან კორღალიძემ 14 მაისს პირველი პრეს-კონფერენცია ჩაატარა. 46 წლის სპეციალისტმა განაცხადა, რომ ახლა გუნდის ყველაზე დიდი „მტერი” დრო გახდა.

„ჩემთვის დიდი პატივია, ვმართო ისეთი წარმატებული კლუბი, როგორიც „დილაა”. ხელმძღვანელობამ ნდობა გამომიცხადა, ჩვენი ამბიციები დაემთხვა და ძალიან დიდი მოტივაციით მოვედი”, — განაცხადა კორღალიძემ.

კოაჭი ხაზს უსვამს, რომ რადიკალური ცვლილებები არ იგეგმება: „ყოველთვის ვუყურებდი „დილის” თამაშებს. მომწონდა ის შემტევი სტილი. ხარვეზები ყველა გუნდს აქვს, ვეცდებით მალე გამოვასწოროთ. ძირეულ ცვლილებებს არ ვაპირებ — „დილა” წარმატებული კლუბია, ვეცდები, პატარ-პატარა დეტალები შევძინო”.

ევროტურნირებზეც ისაუბრა: „ჩემი წარსული გამოცდილება ევროკუბოკებში პოზიტიური არ ყოფილა. მაგრამ წარმატება მარცხის გარეშე არ მოდის. ვფიქრობ, შარშანდელი ევროტურნირების ყველა ქართული კლუბი სწორ დასკვნებს გააკეთებს — კონკრეტულ შემთხვევაში, „დილაც””.

ეროვნულ ლიგაში მიზანი ნათელია: „იბერიაში” 30-მატჩიანი წაუგებელი სერია „დილაშიც” გაიმეოს. „ახლა ჩვენი ყველაზე დიდი მტერი არის დრო. ერთ ან ორ კვირაში შეუძლებელია რადიკალური ცვლილება, ეტაპობრივად დაინახავთ გაუმჯობესებას”.

კორღალიძე პრეს-კონფერენციის შემდეგ გულშემატკივრებს შეხვდა. მის დებიუტს 15 მაისს, ტორპედოსთან გასვლით მატჩში ვნახავთ.