საქართველოს საკონსტიტუციო სასამართლომ არ დააკმაყოფილა მოსამართლე მანანა კობახიძის შუამდგომლობა „ქართული ოცნების“ მიერ ოპოზიციური პარტიების აკრძალვის მიზნით შეტანილი სარჩელის განხილვიდან აცილების შესახებ. კობახიძე შიშობს, რომ მისი წარსული პოლიტიკური საქმიანობა და განცხადებები მის მიუკერძოებლობას ეჭვქვეშ დააყენებს.

„ქართულმა ოცნებამ“ სარჩელი თავდაპირველად 2025 წლის ნოემბერში შეიტანა, სადაც „ერთიანი ნაციონალური მოძრაობის“ (ენმ), „ლელო/ძლიერი საქართველოსა“ და „ახალი/კოალიცია ცვლილებისთვის“ აკრძალვას ითხოვდა. მოგვიანებით, 2026 წლის აპრილში, სარჩელს პარტია „ფედერალისტები“, ხოლო სექტემბერში პარლამენტში წარმოდგენილი ერთადერთი ოპოზიციური პარტია „საქართველოსთვის“ დაემატა. ამ ცვლილებების გამო „ქართულ ოცნებას“ ყოველ ჯერზე თავიდან შეჰქონდა სარჩელი, რითაც ნულდებოდა სასამართლოს მიერ საქმის განხილვისა და გადაწყვეტილების მიღების მაქსიმალური 9-თვიანი ვადა.

სექტემბერში განხორციელებული ბოლო წარდგენის შემდეგ, საქმე განსახილველად გადაეცა არა სამი მოსამართლისგან შემდგარ კოლეგიას, არამედ სასამართლოს პლენუმს ცხრა მოსამართლის შემადგენლობით. სასამართლომ ეს გადაწყვეტილება იმით ახსნა, რომ საჭირო იყო კონსტიტუციის განმარტება „იშვიათი და/ან განსაკუთრებით მნიშვნელოვანი სამართლებრივი საკითხის“ თაობაზე.

„ქართული ოცნების“ ყოფილმა დეპუტატმა მანანა კობახიძემ აცილების შესახებ შუამდგომლობა იმ არგუმენტით წარადგინა, რომ მისმა მონაწილეობამ შესაძლოა მიუკერძოებლობასთან დაკავშირებით „გონივრული ეჭვები“ გააჩინოს. მან განმარტა, რომ იგი იყო „ქართული ოცნების“ დამფუძნებელი წევრი და გარკვეული პერიოდი პარტიის თავმჯდომარის პოსტსაც იკავებდა. ამასთან, „ქართული ოცნების“ წევრობისას იგი მერვე და მეცხრე მოწვევის პარლამენტის დეპუტატად აირჩიეს.

მან ასევე ყურადღება გაამახვილა წარსულში გაკეთებულ განცხადებებზე, როგორც უფლებადამცველი ადვოკატის, ისე „ქართული ოცნების“ დეპუტატის რანგში, რომლებიც „ერთიან ნაციონალურ მოძრაობასა“ და მის წევრებს ეხებოდა.

თავის შუამდგომლობაში კობახიძემ განაცხადა, რომ იგი „საჯაროდ, აქტიურად აკრიტიკებდა“ მათ „მათი მმართველობის პერიოდთან დაკავშირებული სისტემური დანაშაულებისა და ადამიანის ფუნდამენტური უფლებების დარღვევების გამო“. პოლიტიკური დებატებისას კი, მათგან ღიად მოითხოვდა პასუხისმგებლობის აღებას სწორედ იმ ქმედებებზე, რომლებიც კონსტიტუციური სარჩელის მიხედვით, ამ პარტიების არაკონსტიტუციურად ცნობისა და აკრძალვის მთავარ არგუმენტებად არის დასახელებული.

შუამდგომლობის თანახმად, ერთ-ერთი პლენარული სხდომის დროს, მან „პირდაპირ მოუწოდა“ ნაციონალური მოძრაობის წევრებს „პარტიის დაშლისა და პოლიტიკური ველიდან საერთოდ წასვლისაკენ“.

თუმცა, საკონსტიტუციო სასამართლომ არ დააკმაყოფილა კობახიძის შუამდგომლობა და აღნიშნა, რომ მოსამართლედ დანიშვნამდე გაკეთებული განცხადებების აცილების წინაპირობად განსაზღვრა „გამოიწვევს საკონსტიტუციო სასამართლოს საქმიანობის პარალიზებას და უარყოფითად აისახება ამ ინსტიტუციის როგორც მიუკერძოებლობაზე, ასევე ობიექტურობაზე“. პლენუმის რვა მოსამართლიდან ორმა განსხვავებული აზრი დააფიქსირა, მათ შორის იყვნენ თავად კობახიძე და მოსამართლე ევა გოცირიძე.