ჯანმრთელობის მსოფლიო ორგანიზაციამ კონგოს დემოკრატიულ რესპუბლიკაში ებოლას ცხელების აფეთქება კრიზისულად აღიარა და განაცხადა, რომ მასთან საბრძოლველად მომდევნო სამ თვეში 115 მილიონი დოლარია სახ. ამჟამად კრიზისზე რეაგირებაში ჩართული სტრუქტურები საჭირო დაფინანსების მხოლოდ 35 პროცენტით არიან უზრუნველყოფილი.

ჯანმოს მონაცემებით, კდრ-ში ებოლათი დაინფიცირების 344 შემთხვევაა დადასტურებული, მათგან 60 ლეტალური გამოსავლით დასრულდა. მეზობელ უგანდაში — 9 შემთხვევა, 1 გარდაცვლილი და ერთი სავარაუდო შემთხვევა.

„აფეთქებამ სერიოზული ფორმა მიიღო და ჩვენ კვლავ ვცდილობთ სიტუაციას დავეწიოთ. თუმცა კდრ-ის მთავრობის ხელმძღვანელობით თანდათანობით ვახერხებთ დანაკარგის ანაზღაურებას,” — განაცხადა ჯანმოს გენერალურმა დირექტორმა ტედროს ადჰანომ გებრეიესუსმა.

ვირუსი თავდაპირველად კდრ-ის იტურის პროვინციაში გამოვლინდა, შემდეგ ჩრდილოეთ კივუსა და სამხრეთ კივუს პროვინციებში, ბოლოს კი — უგანდის ტერიტორიაზე. გავრცელების მონიტორინგს ართულებს ქვეყნის შიდა არასტაბილური ვითარება, ლაბორატორიული ტესტირების შეზღუდვები და სამედიცინო ობიექტებზე განმეორებითი თავდასხმები.

ჯანმოს სპეციალისტების შეფასებით, ეპიდემიის დასაწყისში დაკარგულმა დრომ განაპირობა ვირუსის ამდენად ფართო გავრცელება — ინფექციამ მოასწრო როგორც სხვა პროვინციებში, ასევე ქვეყნის ფარგლებს გარეთ გასვლა.