„სამწუხაროა, რომ შანტაჟისთვის გამოიყენება ვიზალიბერალიზაციის საკითხი,” — ასე გამოეხმაურა ყირგიზეთში ვიზიტით მყოფი ირაკლი კობახიძე ბრიუსელში 11 ივნისს გამართულ შეხვედრას, სადაც ვიზების საკითხები განიხილებოდა.

კობახიძის თქმით, „კონკრეტული ძალები ცდილობენ ვიზალიბერალიზაცია ქართველი ხალხისა და ჩვენი სახელმწიფოს წინააღმდეგ გამოიყენონ.”

„ზოგადი სურათი ყველასთვის ცხადია. ყველა მიმართულებით დიალოგისთვის ღია ვართ — მათ შორის ბრიუსელში განხილულ თემებზეც, კერძოდ ვიზებთან დაკავშირებულ საკითხებზე. ჩვენი პასუხები ძალიან მკაფიოა. ყველაფერი დანარჩენი პოლიტიკაა. ვიმედოვნებთ, რომ საბოლოოდ ევროპულ ბიუროკრატიაში მიდგომები შეიცვლება და ქართველი ხალხის მიმართ სამართლიანი დამოკიდებულება ჩამოყალიბდება,” — განაცხადა კობახიძემ.

პრემიერ-მინისტრის მტკიცებით, საქართველომ ადრე ყველა სხვა გზა ჩაკეტა შანტაჟისთვის და ვიზალიბერალიზაცია ერთადერთ „თეორიულ ინსტრუმენტად” დარჩა. „ეს არასწორი მიდგომაა. გვინდა სამართლიანი მოპყრობა და სწორედ ამ გზავნილით ვესაუბრებით ჩვენს ევროპელ პარტნიორებს,” — დასძინა მან.