პრემიერ-მინისტრი ირაკლი კობახიძე ამერიკის შეერთებული შტატების სახელმწიფო დეპარტამენტის წარმომადგენლებს შეხვდა. საქართველოს მთავრობის ადმინისტრაციის ცნობით, შეხვედრაზე ყურადღება გამახვილდა ქართულ-ამერიკული ურთიერთობების გადატვირთვასა და კონკრეტულ გზამკვლევზე დაფუძნებული სტრატეგიული პარტნიორობის მნიშვნელობაზე.

„მთავრობის მეთაურმა კიდევ ერთხელ დაადასტურა საქართველოს მთავრობის მზადყოფნა ურთიერთპატივისცემაზე დაფუძნებული ორმხრივი ურთიერთობების სუფთა ფურცლიდან განახლებისთვის”, — ნათქვამია ოფიციალურ შეტყობინებაში.

შეხვედრაზე ასევე ხაზი გაესვა საქართველოს, როგორც სანდო და საიმედო პარტნიორის, როლს რეგიონში. კობახიძემ განაცხადა, რომ საქართველო მზადაა, მომავალშიც ხელი შეუწყოს რეგიონში ხანგრძლივი მშვიდობისა და სტაბილურობის უზრუნველყოფას.

მთავრობამ „მისასალმებლად” შეაფასა სახელმწიფო დეპარტამენტის ინტერესი საქართველოსადმი, რაც ბოლო პერიოდის კონტაქტების სიხშირეშიც გამოიხატება. შეხვედრას ვიცე-პრემიერი, საგარეო საქმეთა მინისტრი მაკა ბოჭორიშვილი და მთავრობის ადმინისტრაციის უფროსი ლევან ჟორჟოლიანი ესწრებოდნენ.