პოლიტიკური მოტივით დაკავებული პატიმრების შეწყალებისთვის სინანულის გამოვლენა და დანაშაულის აღიარება სავალდებულო პირობაა — ეს განაცხადა პრემიერმინისტრმა ირაკლი კობახიძემ 15 მაისს ჟურნალისტებთან საუბრისას.

ჟურნალისტებმა კობახიძეს ჰკითხეს, რატომ ვერ ისარგებლეს ამ მიდგომით დანიელ მუმლაძემ და გურამ ხუტაშვილმა — ორმა ადამიანმა, ვინც 112-ის კამერების დაზიანებისთვის სამ-სამ წლით ციხეში გაგზავნეს, მიუხედავად დანაშაულის აღიარებისა და ზარალის ანაზღაურების მზადყოფნისა. კობახიძეს პასუხი იყო, რომ სასამართლო „მკაცრად სამართლებრივი სტანდარტებით” მოქმედებს, შეწყალება კი „პოლიტიკური გადაწყვეტილებაა” და პრეზიდენტის კომპეტენციაა.

„მთავარი არის მონანიება, სინანული და დანაშაულის აღიარება,” — განაცხადა კობახიძემ.

კობახიძემ ასევე განმარტა სინანულის პრევენციული ფუნქცია: „ჩვენ ვინმეს ბოდიში კი არ გვჭირდება — სინანული მნიშვნელოვანია იმიტომ, რომ აღარავის გაუჩნდეს ცდუნება, ძალადობრივად სცადოს ქვეყანაში გადატრიალება.”

ჟურნალისტების კითხვაზე, თუ ახლად არჩეული კათალიკოს-პატრიარქი შიო III პატიმრების შეწყალებისკენ მოუწოდებს, კობახიძემ მოუწოდა, „ეკლესიის სახელით არ ლაპარაკობდნენ” და ხაზი გაუსვა, რომ სახელმწიფო პოზიცია უცვლელია.