საქართველოს პრემიერ-მინისტრი ირაკლი კობახიძე ბაქოში გაემგზავრა, სადაც გაეროს ადამიანთა დასახლებების პროგრამასთან (UN-Habitat) პარტნიორობით გამართულ მსოფლიო ურბანულ ფორუმის მე-13 სესიაში მიიღებს მონაწილეობას.

მთავრობის ადმინისტრაციის ცნობით, პრემიერ-მინისტრი ფორუმზე სიტყვით გამოვა. ასევე დაგეგმილია კობახიძის შეხვედრა აზერბაიჯანის პრეზიდენტ ილჰამ ალიევთან. სამიტის ფარგლებში 180-ზე მეტი ქვეყნის ლიდერები კლიმატის ცვლილებებითა და კონფლიქტებით გამოწვეული საბინაო კრიზისის გადაჭრის გზებს განიხილავენ.

კობახიძის დელეგაციაში შედიან: ვიცე-პრემიერი, საგარეო საქმეთა მინისტრი მაკა ბოჭორიშვილი, ეკონომიკის მინისტრი მარიამ ქვრივიშვილი, შინაგან საქმეთა მინისტრი სულხან თამაზაშვილი და მთავრობის ადმინისტრაციის უფროსი ლევან ჟორჟოლიანი.

შინაგან საქმეთა მინისტრი თამაზაშვილი ბაქოში ცალკე შეხვდება აზერბაიჯანის შინაგან საქმეთა მინისტრს ვილაიათ ეივაზოვს. შეხვედრაზე განიხილავენ ორ ქვეყანას შორის სამართალდაცვითი სფეროს თანამშრომლობის გაძლიერების პერსპექტივებს.

ამავდროულად, პარლამენტის თავმჯდომარე შალვა პაპუაშვილი ოფიციალური ვიზიტით ჩინეთის სახალხო რესპუბლიკაში გაემგზავრა. ეს საქართველოს პარლამენტის სპიკერის პირველი ოფიციალური ვიზიტია ჩინეთში ბოლო 20 წლის განმავლობაში. ვიზიტის ფარგლებში პაპუაშვილი მაღალი დონის შეხვედრებს გამართავს.

პაპუაშვილის დელეგაციაში შედიან: პარლამენტის თავმჯდომარის პირველი მოადგილე, საქართველო-ჩინეთის სამეგობრო ჯგუფის ხელმძღვანელი გიორგი ვოლსკი; მოადგილეები ნინო წილოსანი და სოზარ სუბარი; საგარეო ურთიერთობათა კომიტეტის თავმჯდომარე ნიკოლოზ სამხარაძე და სოფლის მეურნეობის კომიტეტის თავმჯდომარე გელა სამხარაული.