პრემიერ-მინისტრმა ირაკლი კობახიძემ სპეციალური ბრიფინგი გამართა, რომელიც მთლიანად „ქართული ოცნების” საპატიო თავმჯდომარე ბიძინა ივანიშვილს მიუძღვნა. მისი განცხადებით, ივანიშვილი „პოლიტიკის გროსმაისტერია” — „გამორჩეული ინტელექტისა და უანგარო პატრიოტიზმის” მქონე ლიდერი.

„სწორედ ამ ორმა თვისებამ შეაძლებინა მას 2012 წელს ის, რაც ყველას შეუძლებელი ეგონა — გროსმაისტერულად ჩამოეშორებინა ძალაუფლებას უცხოური აგენტურა,” — განაცხადა კობახიძემ.

ბრიფინგზე კობახიძემ განმარტა, რომ ივანიშვილი, „ქართული ოცნების” საპატიო თავმჯდომარე და პოლიტიკური საბჭოს წევრი, ყოველდღიური სამთავრობო მართვასა და საკადრო გადაწყვეტილებებში არ ერევა, თუმცა სტრატეგიულ საკითხებზე მასთან კონსულტაცია „ფასდაუდებელია.”

„სამთავრობო გადაწყვეტილებებზე გავლენას ახდენს იმ ფარგლებში, რა ფარგლებშიც ეს მმართველი პარტიის საპატიო თავმჯდომარის როლს შეესაბამება. ის არ ერევა სამთავრობო მენეჯმენტსა და საკადრო გადაწყვეტილებებში,” — განმარტა პრემიერმა.

კობახიძემ ასევე ხაზი გაუსვა, რომ ივანიშვილს „პოლიტიკიდან პირადი სარგებელი არასდროს მიუღია” და სანქციებმა — „რომლებიც მის ოჯახსაც დიდ უხერხულობას უქმნის” — ვერ აიძულეს ვერც ის, ვერც ოჯახი, „ქვეყნის ინტერესების წინააღმდეგ ერთი ნაბიჯი გადაედგათ.”

ბრიფინგი ოპოზიციისა და დასავლელი პარტნიორების კრიტიკის ფონზე გამართა კობახიძემ — ისინი ივანიშვილს ჩრდილოვანი ძალაუფლების მქონე პიროვნებად ახასიათებენ. ამ ბრალდებებს კობახიძე „სრულ სიყალბეს” უწოდებს და ამბობს, რომ ბოლო 14 წლის მშვიდობა, სუვერენიტეტი და ეკონომიკური ზრდა „პირველ რიგში ბიძინა ივანიშვილის დამსახურებაა.”