ბრიფინგზე პრემიერ-მინისტრმა ირაკლი კობახიძემ განაცხადა, რომ საქართველოს ევროკავშირთან ურთიერთობების გადატვირთვა „ძალიან მარტივად” შეიძლება — ამისთვის ევროპულ ბიუროკრატიას მხოლოდ საკუთარი კომპლექსების დაძლევა სჭირდება.

„ევროპული ბიუროკრატია საკუთარი უსამართლობის მძევალია. თვითონვე შექმნეს ეს წრე, თვითონვე ჩაიკეტეს — ახლა კი ვეღარ გამოდიან. თუ ამ კომპლექსებს დაძლევენ, ჩვენი ხელი გაწვდილია — მათი კომპლექსებისგან გათავისუფლებას ველოდებით,” — თქვა კობახიძემ.

ბრიფინგი მოჰყვა „ქართული ოცნების” ღია წერილს ევროკომისიის, ევროსაბჭოსა და ევროპარლამენტის ხელმძღვანელებისადმი, სადაც მმართველი პარტია კოპენჰაგენის დემონსტრანტთა პოლიციური დარბევის შეფასებას ითხოვს.