პრემიერ-მინისტრმა ირაკლი კობახიძემ 10 ივნისს გამართულ ბრიფინგზე ჩინეთთან სტრატეგიულ პარტნიორობას „სამაგალითო” უწოდა. მისი თქმით, 2023 წელს სტრატეგიული პარტნიორობის შესახებ დოკუმენტის ხელმოწერის შემდეგ ორ ქვეყანას შორის ურთიერთობები „ძალიან დინამიურად” განვითარდა.

კობახიძემ დასახელა კონკრეტული მიღწევები: მაღალი დონის ვიზიტები, სავაჭრო ბრუნვა, უვიზო რეჟიმი, პირდაპირი ფრენები და საგანმანათლებლო თანამშრომლობა. 2023 წლიდან გაფორმდა 13 „მნიშვნელოვანი” შეთანხმება, კიდევ ექვსი კი „საბოლოო განხილვის ეტაპზეა”.

„სრულიად თვალნათელია, რომ ეს არ არის სტრატეგიული პარტნიორობა ქაღალდზე — ის კონკრეტულ სარგებელს იძლევა ორივე ქვეყნისთვის. სწორედ ასეთი უნდა იყოს სამაგალითო სტრატეგიული პარტნიორობა — ურთიერთპატივისცემაზე, სამართლიანობასა და ღირსებაზე დაყრდნობილი”, — განაცხადა კობახიძემ.

პრემიერმა ხაზი გაუსვა, რომ „ჩინეთის ხელისუფლება ჩვენს ქვეყანას ეპყრობა როგორც თანასწორს” — რაც, მისი სიტყვებით, „გლობალური პოლიტიკის არსებული მანკიერებების ფონზე განსაკუთრებულად თვალშისაცემია”. „ყოვლისმომცველი სტრატეგიული პარტნიორობის” ხელშეკრულება, კობახიძის განცხადებით, „ახალ ეტაპს ჩაუყრის საფუძველს ქართულ-ჩინური ურთიერთობების გაღრმავების გზაზე.”