საქართველომ და აზერბაიჯანმა ბაქოში ენერგეტიკისა და ტრანსპორტის სფეროში შეთანხმებათა პაკეტს, ასევე ორ დედაქალაქს შორის 6-წლიანი შესვენების შემდეგ სარკინიგზო მიმოსვლის აღდგენის პროტოკოლს მოაწერეს ხელი.

შეთანხმებებს ხელი მოეწერა „ქართული ოცნების” პრემიერ-მინისტრ ირაკლი კობახიძესა და აზერბაიჯანის პრეზიდენტ ილჰამ ალიევს შორის 18 მაისს ბაქოში გამართული შეხვედრის შემდეგ — მსოფლიო ურბანული ფორუმის (WUF13) ფარგლებში.

საქართველოს მთავრობის ადმინისტრაციის ინფორმაციით, ენერგეტიკული პაკეტი მოიცავს: საქართველოსა და აზერბაიჯანს შორის ელექტროენერგიის მიწოდებისა და სატრანზიტო მოძრაობის ძირითად პირობებზე 20-წლიანი მთავრობათაშორისი ხელშეკრულება; 2003 წელს გაფორმებული გაზის ყიდვა-გაყიდვის ხელშეკრულების კიდევ 20 წლით გაგრძელება — სოციალური გაზმომარაგების გარანტიებით.

პრემიერ-მინისტრ კობახიძის განცხადებით, შეთანხმებათა ერთ-ერთი მთავარი ელემენტი ბაქო-თბილისი-სუფსის მილსადენია, რომელიც ბოლო სამი წლის განმავლობაში არ ოპერირებდა. „ახალი შეთანხმების საფუძველზე ჩვენ ვუზრუნველყოფთ ამ მილსადენის ამოქმედებას, — განაცხადა კობახიძემ. — ეს არის ჩვენი საკუთრება და რჩება საქართველოს საკუთრებაში, ქვეყანა ყოველწლიურად ათეულობით მილიონის შემოსავალს მიიღებს”.

კობახიძემ შეთანხმებები „ისტორიული მნიშვნელობის” უწოდა და ხაზი გაუსვა გეოგრაფიულ განზომილებას: „ჩვენ, აზერბაიჯანთან ერთად, ვაკავშირებთ კასპიის ზღვას შავ ზღვასთან და შესაბამისად ევროპას — აზიასთან”.

ხელმომწერები: საქართველოს მხრიდან — ეკონომიკისა და მდგრადი განვითარების მინისტრი მარიამ ქვრივიშვილი; აზერბაიჯანის მხრიდან — ეკონომიკის მინისტრი მიქაილ ჯაბაროვი, ენერგეტიკის მინისტრი ფარვიზ შაჰბაზოვი და ციფრული განვითარებისა და ტრანსპორტის მინისტრი რაშად ნაბიევი.