კიევში სულ მცირე 7 ადამიანი დაიღუპა და 24 დაშავდა რუსეთის ჯარების მასირებული შეტევის შედეგად. უკრაინის დედაქალაქზე დრონებით და რაკეტებით ბოლო ხუთ დღეში მეორე მასირებული შეტევა ხუთიდან ექვსი ივლისის ღამით დაიწყო.

ადგილობრივმა ხელისუფლებამ მსხვერპლის შესახებ პირველი ცნობების გავრცელება 6 ივლისს გამთენიისას დაიწყო.

კიევის მერის, ვიტალი კლიჩკოს ინფორმაციით, 24 დაშავებულიდან ჰოსპიტალიზაცია დასჭირდა 14-ს. მათ შორის ორი ბავშვია.

კიევის პოდოლის და დარნიცის რაიონებში ნაწილობრივ დანგრეულია რამდენიმე მრავალბინიანი სახლი. დაზიანებულია სახლები და სხვა შენობები. ობოლონის რაიონში ხანძარმა მოიცვა საწყობები.

განახლება: უკრაინის გენერალური პროკურატურის ოფისმა სოციალური ქსელებით გაავრცელა ცნობა, რომ 6 ივლისის დილის რვა საათის მონაცემებით, კიევში დაღუპულია 10 და დაშავებულია 46 ადამიანი. უკრაინის საგანგებო სიტუაციების სამსახურის ინფორმაციით, დედაქალაქში ნაწილობრივ დანგრეული და დაზიანებულია სულ მცირე 15 სახლი.

დაახლოებით ერთი საათის შემდეგ კიევის მერმა ვიტალი კლიჩკომ ტელეგრამ-არხზე დაწერა, რომ საავადმყოფოში გარდაიცვალა ერთი დაჭრილი. კიევში დაღუპულთა რიცხვი 11-მდე გაიზარდა.

კიევზე რუსეთის მასირებული შეტევის შედეგები. 2026 წლის 6 ივლისი

კიევის ოლქი

რუსეთის ჯარებმა მასირებული შეტევა მიიტანეს კიევის ოლქზეც. ადგილობრივი სამხედრო ადმინისტრაციის ხელმძღვანელ მიკოლა კალაშნიკის ინფორმაციით, დაიღუპა სულ მცირე ერთი და დაშავდა 15 ადამიანი.

კიევის ოლქის ბუჩის, ვიშგოროდის და ბროვარის რაიონებში დაზიანებულია კერძო სახლები და საწარმოები. კალაშნიკს კონკრეტული საწარმოები არ დაუსახელებია. მისი ინფორმაციით, ყველაზე რთული სიტუაცია ბუჩის რაიონის ქალაქ ვიშნევეშია „ფეთქებადსაშიში საგნების განმეორებითი დეტონაციის საფრთხის გამო”. დეტალები კალაშნიკს არ დაუკონკრეტებია.

ვიშნევეს ადმინისტრაციამ სოციალური ქსელებით გაავრცელა ქალაქის რვა ქუჩის ჩამონათვალი და ადგილობრივ მცხოვრებთ მოუწოდა, გარეთ ნუ გავლენ.

უკრაინული ტელეგრამ-არხების ცნობით, რუსეთის ჯარებმა ვიშნევეში დაარტყეს ქარხანა „ვიზარს“, რომელიც აწარმოებს სამხედრო ტექნიკას და იარაღს, მათ შორის „ნეპტუნის“ ტიპის რაკეტების საბრძოლო ნაწილებს.

400-ზე მეტი რაკეტა და დრონი

უკრაინის საჰაერო ძალების მიერ 6 ივლისს დილით გამოქვეყნებული მონაცემებით, რუსეთის ჯარებმა სხვადასხვა ტიპის 68 რაკეტა და 351 უპილოტო საფრენი აპარატი გამოიყენეს უკრაინაზე მასირებული შეტევისას, რომლის ძირითადი მიმართულება კიევი იყო.

საჰაერო ძალების თანახმად, რაკეტებს შორის იყო 6 გემსაწინააღმდეგო „ცირკონი“, 23 ბალისტიკური „ისკანდერი“ და 39 ფრთოსანი რაკეტა.

ადგილობრივი დროით დილის ცხრის ნახევრისთვის დადასტურებული იყო 37 ფრთოსანი რაკეტის და 326 დრონის მოგერიება და 29 სხვა რაკეტითა და 18 დრონით პირდაპირი დარტყმა 34 ადგილზე.

რუსეთის სტანდარტული განცხადება

6 ივლისს დილით რუსეთის თავდაცვის სამინისტროს ტელეგრამ-არხზე გამოქვეყნდა ცნობა, რომ „რუსეთის ტერიტორიაზე სამოქალაქო ინფრასტრუქტურაზე კიევის რეჟიმის ტერორისტული შეტევების პასუხად“ ქალაქ კიევში და კიევის ოლქში დაარტყეს სამხედრო მრეწველობის საწარმოებსა და ენერგოობიექტებს, ხოლო დნეპროპეტროვსკის, პოლტავის, ჩერკასის, ჩერნიგოვის და კიევის ოლქებში - სამხედრო აეროდრომების ინფრასტრუქტურას.

რუსეთის თავდაცვის სამინისტრომ ზუსტად ამ შინაარსის ტექსტი გამოაქვეყნა კიევზე წინა, 2 ივლისის მასირებული შეტევის შემდეგაც.

რუსეთი „ტერორისტულს” უწოდებს უკრაინის თავდაცვის ძალების საპასუხო დარტყმებს სამხედრო დანიშნულების საწარმოებზე, ნავთობგადამამუშავებელ ქარხნებზე, ნავთობის ტერმინალებსა და ტრანსპორტირების მარშრუტებზე რუსეთის ტერიტორიასა და ანექსირებულ ყირიმში.

უკრაინის პრეზიდენტმა არაერთხელ განაცხადა, რომ ეს არის სამართლიანი პასუხი უკრაინის ქალაქებსა და რაიონებზე რუსეთის ყოველდღიურ დარტყმებზე და მიზანია რუსეთის სახელმწიფო სისტემა დააზიანონ, ომის გაგრძელების შესაძლებლობები შეუზღუდონ და ომის შეწყვეტა აიძულონ.

ასევე ნახეთ

კიევში გლოვის დღეა

5 ივლისს საღამოს უკრაინის პრეზიდენტმა ვოლოდიმირ ზელენსკიმ განაცხადა, რომ დაზვერვის მონაცემებით რუსეთი ამზადებს მორიგ მასირებულ დარტყმას. ზელენსკიმ პარტნიორ სახელმწიფოებს კიდევ ერთხელ მოუწოდა, ნუ გააჭიანურებენ უკრაინისთვის საჰაერო თავდაცვის სისტემის რაკეტების, მათ შორის Patriot-ების გადაცემას.

რუსეთის ჯარებმა კიევზე რაკეტებით და დრონებით მასირებული, დამანგრეველი შეტევა მიიტანეს 2 ივლისსაც.

უკრაინის საგანგებო სიტუაციების სამსახურმა სამძებრო-სამაშველო სამუშაოების დასრულების შემდგე, 4 ივლისს განაცხადა, რომ დაიღუპა 31 და დაშავდა 102 ადამიანი.