რუსთავის N12 სასჯელაღსრულების დაწესებულებიდან „ნაციონალური მოძრაობის” პოლიტსაბჭოს თავმჯდომარე ლევან ხაბეიშვილი წერილს ავრცელებს, რომელიც პროკურატურის მის წამებასთან დაკავშირებულ გამოძიებას ეხება. წერილი ადვოკატმა ჟურნალისტებს გადასცა.

ხაბეიშვილი წერს, რომ გამოძიებამ ორი „ლიფსიტი” (უმნიშვნელო შემსრულებელი) კი დაიჭირა, მაგრამ ბოლომდე არ მიდის: „„ხარება” და გოგა მემანიშვილია პირველ რიგში დასაჭერი. მათ კი ივანიშვილმა, კობახიძემ და მდინარაძემ მისცეს ეს „მწვანე შუქი”. სუს-ის ყოფილი უფროსი ლილუაშვილი და შს ყოფილი მინისტრი გომელაური ასევე ამ „მწვანე შუქის შუა” იყვნენ.”

„300-მდე ადამიანი აწამეს და 5 თუნდაც 10 ლიფსიტის დაკავებით ფონს გასვლა უნდათ. მე მაინტერესებს სისტემის შემოქმედები — ივანიშვილ-კობახიძეები,” — წერს ხაბეიშვილი.

გამოძიება 2024 წლის 30 აპრილის ინციდენტს ეხება: მაშინ შინაგან საქმეთა სამინისტროს განსაკუთრებულ დავალებათა დეპარტამენტის ორმა თანამშრომელმა — ზ.ჩ.-მ და ა.ბ.-მ — ხაბეიშვილს რუსთაველის გამზირზე გამართული აქციის მიმდინარეობისას ფიზიკურად მიაყენეს ზიანი. ორივე ბრალდებულს დღეს პატიმრობა აქვს შეფარდებული.