ოპოზიციური ერთიანი ნაციონალური მოძრაობის ლიდერი ლევან ხაბეიშვილი Facebook-ზე გამოქვეყნებულ პოსტში ამტკიცებს, რომ „ქართული ოცნების” ცნობილი სახე მამუკა მდინარაძის სვანეთსა და კრიპტომაინინგზე გაკეთებული განცხადება ვიქტორ ჯაფარიძის წინაამდეგ იყო მიმართული.

„მდინარაძის განცხადება — სვანეთში მაინინგებთან დაკავშირებით — მიმართული იყო ვიქტორ ჯაფარიძის წინაამდეგ. თუ ეს ასე არ არის, კითხეთ ჯაფარიძეს: ეთანხმება თუ არა იმას, რომ რამდენიმე ყაჩაღის გამო მთელი სვანეთი უნდა დაისაჯოს? ასევე ჰკითხეთ, გამოიმუშავებს თუ არა კრიპტოს მისი კლანი სვანეთში, უფასო დენით,” — წერს ხაბეიშვილი.

ოპოზიციონერი ასევე ეხება ელექტრობის გაძვირებას: „130 მლნ კვტ/სთ რომ ებევრა მდინარაძეს, ჰკითხეთ — ივანიშვილი გლდანში 430 მლნ კვტ/სთ-ს რომ მოიხმარს (თბილისის მოსახლეობის 50%), ამაზე რას ფიქრობს?”

ხაბეიშვილი ამ კონფლიქტს მმართველ გუნდში შიდა კლანურ დაპირისპირებად კვალიფიცირებს: „კობახიძე vs ჯაფარიძე — ეს პასუხია ხუნდაძის საბოტაჟზე კობახიძის მიმართ. სიგნალია: თუ „მეამბოხე ხალხის ძალა” ასე გააგრძელებს, მათ ფულის ტომარას მოსჭრიან.”

მისივე შეფასებით, ივანიშვილის „კართან” შიდა კლანური დაპირისპირების ახალი ტალღა იწყება. „კობახიძე „დასაკლავად” გამზადებულია, მის შემცვლელად კი წულუკიანი და ქვრივიშვილი განიხილება,” — ამტკიცებს ხაბეიშვილი.

ოპოზიციის ლიდერი ასევე ეხება ოპოზიციის სტრატეგიას და მოუწოდებს „კლავიატურაზე კაკუნის” ნაცვლად ამ სიტუაციისთვის შესაბამისი, თავგანწირვისა და რისკის მომთხოვი, გააქტიურებისკენ.