ენმ-ის ერთ-ერთმა ლიდერმა ლევან ხაბეიშვილმა სასამართლო სხდომაზე 2024 წლის საპროტესტო აქციების დროს მის მიმართ განხორციელებული ძალადობის დეტალები გაამჟღავნა. მისი თქმით, ცემა 27 წუთი გაგრძელდა, იწერებოდა ვიდეოზე და ეს ჩანაწერი ირაკლი კობახიძეს — მაშინ პრემიერ-მინისტრს — უგზავნიდნენ.

„საზოგადოებამ უნდა იცოდეს: იქ მხოლოდ ხაბეიშვილი არ უწამებიათ და უცემიათ — ასობით ახალგაზრდა სცემეს. ძალიან მერიდებოდა ჩემს თავზე საუბარი, მაგრამ ფაქტი უტყუარია — სახის ძვლების მოტეხილობა, თავის არეში მძიმე დარტყმები, ნეკნების მოტეხილობები”, — განაცხადა ხაბეიშვილმა.

პოლიტიკოსმა ასევე გაამხილა, რომ ერთ-ერთი თავდამსხმელი — „ხარება” ხარაზიშვილი — მოითხოვდა, ხაბეიშვილს საკუთარი თავის შემაგინებელი სიტყვა ეთქვა სანაცვლოდ, რომ ცემა შეწყვეტილიყო. „ბოდიში, ვერ მოგართვით”, — უპასუხა ხაბეიშვილმა.

„მინდა ნათლად ვთქვა: ამ ყველაფრის მთავარი ორგანიზატორი ივანიშვილი იყო, მთავარი შემსრულებელი — კობახიძე. ვიდეო, ჩემი ინფორმაციით, კობახიძეს, მდინარაძეს და გომელაურს უგზავნიდნენ”, — განაცხადა ხაბეიშვილმა.

ცნობისთვის, 2024 წლის საპროტესტო აქციების დროს ზვიად მოსიაშვილის, ლევან ხაბეიშვილისა და გურამ როგავას მიმართ განხორციელებული ძალადობის გამო სამი ყოფილი და ერთი მოქმედი სპეცრაზმელი, ასევე შსს-ს დაცვის პოლიციის თანამშრომელი დააკავეს. ხუთ ბრალდებულს შორის ორი უკვე პატიმრობაშია სხვა საქმეებზე.