2026 წლის პირველ კვარტალში საქართველოს რეზიდენტების მიერ საზღვარგარეთ გასვლის მაჩვენებელი 4.3%-ით გაიზარდა — სულ 640.9 ათასი გასვლა დაფიქსირდა. ამის შესახებ სტატისტიკის ეროვნული სამსახური (საქსტატი) იუწყება.

ამ მონაცემებიდან საქართველოს რეზიდენტი ვიზიტორების მიერ განხორციელებულმა ვიზიტებმა 496.3 ათასი შეადგინა — ეს 2025 წლის ანალოგიური პერიოდის მაჩვენებელზე 2.9%-ით მეტია. ვიზიტების 99.1% განმეორებითი ხასიათის ვიზიტი იყო, ხოლო ერთ ვიზიტზე საშუალოდ 6.8 ღამე მოდიოდა — წინა წლის ანალოგიური პერიოდის მაჩვენებელზე 1.4%-ით მეტი.

ცალკეულ ქვეყნებს შორის ლიდერობდა თურქეთი, სადაც პირველ კვარტალში 214 ათასი ვიზიტი განხორციელდა. მეორე ადგილზე რუსეთი მოექცა — 111 ათასი გასვლით.