სომხეთის საგამოძიებო კომიტეტმა 20 მაისს განაცხადა, რომ პარლამენტის დეპუტატობის კანდიდატმა ნარეკ კარაპეტიანმა „მიზანმიმართულად დამალა ინფორმაცია უცხო ქვეყნის — სავარაუდოდ, რუსეთის — მოქალაქეობის შესახებ”. გამოძიება სომხეთის სისხლის სამართლის კოდექსის 449-ე მუხლით დაიწყო, რომელიც ითვალისწინებს ჯარიმას ან თავისუფლების აღკვეთას სამ წლამდე ვადით.

ნარეკ კარაპეტიანი ცნობილი ოპოზიციური მილიარდერის სამველ კარაპეტიანის ძმისშვილია. სამველ კარაპეტიანი — „ტაშირ ჯგუფის” მფლობელი — სომხეთის, რუსეთისა და კვიპროსის მოქალაქეა; მისი თქმით, ამ უკანასკნელი ორი ქვეყნის მოქალაქეობის დათმობის პროცედურები უკვე დაწყებული აქვს.

სომხეთის პარლამენტის სპიკერმა ალენ სიმონიანმა 19 მაისს Facebook-ზე გამოაქვეყნა დოკუმენტი, სადაც ნარეკ კარაპეტიანის გასწვრივ, მოქალაქეობის გრაფაში, წერია „რუსეთის ფედერაციის მოქალაქე”. დოკუმენტის წარმომავლობა გაურკვეველია.

ნარეკ კარაპეტიანი ბრალდებას უარყოფს. 20 მაისს Facebook-ზე გამოქვეყნებულ განცხადებაში მან მთელ საქმეს „ყალბი ამბები” უწოდა და ამტკიცებს, რომ ბრალდების მიზანია ფაშინიანთან დაკავშირებული კრიტიკისგან საზოგადოების ყურადღების გადატანა.

18–19 მაისს სომხეთის პრემიერ-მინისტრ ნიკოლ ფაშინიანს ერევანში, საარჩევნო კამპანიის მიმდინარეობისას, რამდენიმე მოქალაქე დაუპირისპირდა. საპარლამენტო არჩევნები სომხეთში 7 ივნისს ჩატარდება.