კანადის მთავრობამ ოთხშაბათს პარლამენტში ციფრული უსაფრთხოების კანონპროექტი შეიტანა, რომელიც 16 წლამდე ასაკის ბავშვებს სოციალური მედიის ანგარიშების ქონას უკრძალავს. Deutsche Welle ამ ამბავს ავრცელებს.

„ჩვენ ვერ ვიცავთ ჩვენს შვილებს. საკმარისია”, — განაცხადა კანადის კულტურის მინისტრმა მარკ მილერმა კანონპროექტის პარლამენტში შეტანის დღეს.

დოკუმენტი შვიდ კატეგორიის მავნე კონტენტს ეხება: ბავშვის სექსუალური ექსპლუატაცია; კონტენტი, რომელიც თვითდაზიანებისკენ უბიძგებს; ბულინგი; ძალადობისკენ მოწოდება; სიძულვილის გაღვივება; ტერორისტული კონტენტი; ინტიმური ფოტო/ვიდეო, გავრცელებული უნებართვოდ.

გამონაკლისი შესაძლებელია იმ პლატფორმებისთვის, რომლებიც დაამტკიცებენ, რომ კონკრეტულ უსაფრთხოების სტანდარტებს აკმაყოფილებენ. ამ კრიტერიუმების შინაარსი მოგვიანებით გახდება ცნობილი.

კანონი ახალ მარეგულირებელს ქმნის — „კანადის ციფრული უსაფრთხოების კომისიას”. ამ ორგანოს ამოქმედებას კანონის მიღებიდან 18 თვე დასჭირდება. Reuters-ის ცნობით, თავად კანონმდებლობის მიღება ერთ წელს შეიძლება მოითხოვდეს. პლატფორმების მიმართ ჯარიმა გლობალური შემოსავლის 3%-ს ან 10 მილიონ კანადურ დოლარს (დაახლ. 7.2 მლნ აშშ დოლარი) შეადგენს — იმის მიხედვით, რომელი უფრო მაღალია.