ზაარბრიუკენი, გერმანიის დასავლური ქალაქი, რომელსაც 1975 წლიდან თბილისთან ოფიციალური დაძმობილება აკავშირებს, 21 მაისს გეგმავდა ყველა კონტაქტის გაწყვეტის გადაწყვეტილების მიღებას. ამ ამბის გამო თბილისის მერმა კახა კალაძემ „ფეისბუქზე” „სამძიმრის წერილი” გამოაქვეყნა.

ზაარბრიუკენსა და თბილისს შორის მეგობრობის შეთანხმება 1975 წლით თარიღდება — ეს იყო დასავლეთ გერმანიის ქალაქსა და საბჭოთა კავშირის ქალაქს შორის პირველი ოფიციალური დაძმობილება. გერმანული გამოცემა Saarbrücker Zeitung-ი 18 მაისს წერდა, რომ ზაარბრიუკენის მერი უვე კონრადტი საკრებულოს წარუდგენდა რეზოლუციის პროექტს, რომლის მიხედვითაც, 21 მაისს მიღებულიყო თბილისთან „ყველა კონტაქტის” შეწყვეტის გადაწყვეტილება.

გამოცემა მოიხსენიებდა საქართველოში დემოკრატიულ უკუსვლასთან, განსხვავებული აზრის, უმცირესობების, სამოქალაქო საზოგადოებისა და მედიის ჩახშობასთან დაკავშირებულ წუხილებს. ზაარბრიუკენი განმარტავდა, რომ ქვეყანა „ერთპარტიული სახელმწიფოს, პოლიციური სახელმწიფოსა და დიქტატურისკენ” მიემართება. გაზეთი ასევე ხაზს უსვამდა კალაძის ორმაგ როლს — ის თბილისის მერია, მაგრამ ამავდროულად „ქართული ოცნების” გენერალური მდივანიც. „შესაბამისად, კახა კალაძე მხარს უჭერს და იზიარებს პასუხისმგებლობას მთელ ამ მოვლენებზე.”

19 მაისს კალაძემ „ფეისბუქზე” პასუხი გამოაქვეყნა სათაურით „სამძიმრის წერილი გერმანელ ხალხს”: „საქართველოსა და გერმანიის ხალხებს შორის მრავალწლიანი მეგობრობისა და ურთიერთპატივისცემის მიუხედავად, სამწუხაროდ, „დიფ სთეითის” მორჩილი გერმანული ბიუროკრატიის გადაწყვეტილებების გამო, ისტორიული მეგობრობაც კი პოლიტიკური სპეკულაციების საგანი ხდება.”

ბოლო პერიოდში თბილისსა და ბერლინს შორის ურთიერთობები განსაკუთრებით დაიძაბა. „ქართული ოცნების” ხელისუფლება გერმანიის ელჩს, პიტერ ფიშერს ბრალდებებს უყენებს და მას ქვეყნის შიდა საქმეებში ჩარევაში ადანაშაულებს.