თბილისის საქალაქო სასამართლოს მოსამართლე რომეო ტყეშელაშვილმა 6 მაისს ბიზნესმენ ძმებს, დავით და გიორგი მიქაძეებს, ასევე მათ თანამოაზრე გიორგი ჯოხაძეს, სამუდამო პატიმრობა მიუსაჯა. სასამართლომ ისინი კრიმინალური ავტორიტეტის მერაბ ჯანგველაძის ძმის, ბიზნესმენ ლევან ჯანგველაძის, შეკვეთილი მკვლელობის ორგანიზებაში დამნაშავედ ცნო.

მოსამართლემ განაცხადა, რომ „ბრალდების მხარემ შეძლო გონივრულ ეჭვს მიღმა სტანდარტით ბრალდების დადასტურება”. გადაწყვეტილება სასამართლოს შენობის წინ პოლიციის ძლიერი მობილიზაციის ფონზე გამოიტანეს.

გიორგი მიქაძე 2025 წლის აგვისტოდან წინასწარ პატიმრობაში იყო. მისი ძმა დავითი და გიორგი ჯოხაძე საქართველოში არ ცხოვრობენ — მათ განაჩენი დაუსწრებლად გამოუტანეს. ჯანგველაძის მკვლელობაში ასევე იძებნება საქართველოს ყოფილი გენერალური პროკურორი ოთარ ფარცხალაძე, რომელსაც რუსეთის მოქალაქეობა აქვს და ქვეყანაში არ ცხოვრობს — მისთვის განაჩენი ჯერ გამოუტანიათ.

საბოლოო სიტყვაში გიორგი მიქაძემ ბრალდებები უარყო: „5 მილიონი კი არა, 5 მილიარდი რომ მომცენ, კაცს არ მოვკლავ, ოჯახში გავიზარდე ტრადიციებით.” ძმების ადვოკატი შორენა ნიქაბაძე ამბობს, რომ საქმე საკმარის მტკიცებულებებს არ ეყრდნობა და განაჩენი ზემდგომ ინსტანციებში, საჭიროების შემთხვევაში კი — ადამიანის უფლებათა ევროპულ სასამართლოში გასაჩივრდება.

ლევან ჯანგველაძე 2025 წლის მარტში თბილისში მოკლეს. ყოფილ სპეცრაზმელ გელა უძილაურს ოქტომბერში სამუდამო პატიმრობა მიუსაჯეს — მას შეკვეთითა და განზრახ მკვლელობაში ცნეს დამნაშავედ.