გიორგი ბახუაშვილი, რომელიც, გავრცელებული ინფორმაციით, „ქართული ოცნების“ დამფუძნებლისა და საპატიო თავმჯდომარის, ბიძინა ივანიშვილის პირადი დაცვის წევრი იყო და რომელსაც თვეზე ნაკლები პერიოდით შინაგან საქმეთა მინისტრის სულხან თამაზაშვილის მოადგილის თანამდებობა ეკავა, სახელმწიფო უსაფრთხოების სამსახურის უფროსის გეკა გელაძის მოადგილედ დაინიშნა.

შესაბამის ბრძანებას „ქართული ოცნების“ პრემიერ-მინისტრმა ირაკლი კობახიძემ 6 ივლისს მოაწერა ხელი.

ბახუაშვილს საქართველოს სამართალდამცავ ორგანოებში სხვადასხვა თანამდებობა ეკავა. 2023 წლიდან 2026 წლამდე იგი შინაგან საქმეთა სამინისტროს დაცვის პოლიციის დეპარტამენტის მოძრავი ტვირთებისა და ფიზიკურ პირთა დაცვის სამმართველოს განყოფილების უფროსად მუშაობდა. 2017 წლიდან 2023 წლამდე იმავე განყოფილებაში ინსპექტორად მუშაობდა. 2021 წელს იგი შინაგან საქმეთა სამინისტროს განსაკუთრებულ დავალებათა დეპარტამენტის კახეთის სამმართველოს III განყოფილების უფროსი ინსპექტორი იყო. 2007 წლიდან 2017 წლამდე ბახუაშვილი სახელმწიფო დაცვის სპეციალური სამსახურის უფროს ოფიცრად მუშაობდა.

მედიის ინფორმაციით, ბახუაშვილი დიდი ხნის განმავლობაში ივანიშვილის პირადი დაცვის წევრი იყო, თუმცა ამ თანამდებობაზე მისი მუშაობის ზუსტი პერიოდი უცნობია.