ეკონომიკის მინისტრის მარიამ ქვრივიშვილის განცხადებით, საქართველო-აზერბაიჯანის შეთანხმებათა პაკეტს გადამწყვეტი ბიძგი ილჰამ ალიევის ვიზიტმა და „ქართული ოცნების” საპატიო თავჯდომარე ბიძინა ივანიშვილთან შეხვედრამ მისცა.

„მას შემდეგ, რაც შედგა ეს შეხვედრა, ძალიან ეფექტური ნაბიჯებით წავიწიეთ წინ. დღეს შეიძლება ითქვას, რომ ეს ორივე ქვეყნისთვის ისტორიული გადაწყვეტილებაა,” — განაცხადა ქვრივიშვილმა.

18 მაისს ბაქოში გაფორმებული შეთანხმებათა პაკეტი მოიცავს:

• 20-წლიან მთავრობათაშორის შეთანხმებას ელექტროენერგიის მიწოდებასა და სატრანზიტო მიმოსვლაზე;
• 2003 წლის გაზის ხელშეკრულების 20-წლიან გახანგრძლივებას — სოციალური გაზმომარაგების გარანტიებით.

გარდა ამისა, 26 მაისიდან თბილისსა და ბაქოს შორის ყოველდღიური სამგზავრო სარკინიგზო მიმოსვლა განახლდება.

ქვრივიშვილმა განსაკუთრებით ენერგეტიკის სექტორი გამოყო: „ეს უმნიშვნელოვანესი იქნება ჩვენი ქვეყნის ენერგეტიკული უსაფრთხოებისთვის. აზერბაიჯანი კვლავ იქნება ჩვენი სტრატეგიული პარტნიორი.”