ისრაელის პარლამენტმა, ქნესეთმა, 2 ივნისს 120 წევრიდან 106-ის მხარდაჭერით პირველი წაკითხვით დაუჭირა მხარი თვითდაშლას. საბოლოო დამტკიცებისთვის კიდევ ორი წაკითხვაა საჭირო.

კოალიციაში უთანხმოებაა ვადამდელი არჩევნების თარიღზე. ულტრაორთოდოქსი პარტნიორები სექტემბრის დამდეგს ითხოვენ — მნიშვნელოვანი რელიგიური დღესასწაულების წინ — ვინაიდან, მათი შეფასებით, ასე უფრო მეტი ულტრაორთოდოქსი ამომრჩეველი მივა კენჭისყრაზე. პრემიერ-მინისტრ ბენიამინ ნეთანიაჰუს კი სურს, ჯერ რამდენიმე კანონი მიიღოს და სამხედრო მიზნებსაც მიაღწიოს.

კოალიციაში კრიზისი გამოიწვია კანონპროექტის ჩავარდნამ, რომელიც ულტრაორთოდოქს მამაკაცებს სამხედრო სამსახურიდან გაათავისუფლებდა. ქნესეთის დათხოვნის მოთხოვნა სწორედ ამ კომპრომისის არარსებობის ფონზე გაჩნდა.

ისრაელის მედიის ინფორმაციით, არჩევნების თარიღი დადგინდება მხოლოდ მას შემდეგ, რაც გაიმართება ორი დასკვნითი წაკითხვა. სავარაუდო ვადა — 8 სექტემბრიდან 20 ოქტომბრამდე, კანონით კი საბოლოო ვადა 27 ოქტომბერია.