გაეროში ისრაელის ელჩმა დენი დანონმა X-ზე განაცხადა: „ამ გენერალურ მდივანთან ჩვენ დავამთავრეთ.” ისრაელის მისიამ კი გამოაქვეყნა განცხადება, რომ მანამ კონტაქტი გაეროს გენერალური მდივნის ოფისთან არ ექნება, სანამ ანტონიო გუტერეში ამ პოსტზე დარჩება.

ამ გადაწყვეტილების საფუძვლად მოიყვანეს გაეროს გენერალური მდივნის ოფისის ყოველწლიური ანგარიში შეიარაღებული კონფლიქტების ფარგლებში სექსუალური ძალადობის შესახებ — ანგარიშში ისრაელი ეჭვმიტანილ ან პასუხისმგებელ სუბიექტთა სიაში შეიყვანეს.

„ისრაელის შავ სიაში შეყვანა და სექსუალური ძალადობის ომის იარაღად გამოყენებაში ბრალდება სრულიად აღმაშფოთებელია,” — თქვა დანონმა. — „ჩვენი და ჰამასის ტერორისტების ერთ სიაში შეტანა მიუღებელია.”

გაეროს ანგარიში ეყრდნობა „სანდო ინფორმაციას” ისრაელის სამხედრო სასჯელაღსრულების ცენტრებში პალესტინელ პატიმართა წინააღმდეგ სავარაუდო სექსუალური ძალადობის შესახებ. ანგარიშში ასევე ნახსენებია, რომ გაეროს ინსპექტორებს ამ დაწესებულებებში შესვლაზე უარი ეთქვათ.

„ჩვენ მოვიწვიეთ გაეროს წარმომადგენელი, რათა შეემოწმებინა ეს სასაცილო ბრალდებები. ჩამოსვლა არ ისურვეს,” — განაცხადა დანონმა.

გაეროს გენერალური მდივნის სპიკერი სტეფან დიუჟარიკი ამბობს, რომ „გენერალური მდივნის კარი ღია რჩება”. ისრაელსა და გაეროს შორის ურთიერთობები 2023 წლის 7 ოქტომბრიდან — ჰამასის თავდასხმის შემდეგ — ყველაზე მძიმე ეტაპზეა.