1 ივნისიდან შინაგან საქმეთა სამინისტროში სიძულვილის ენის წინააღმდეგ ბრძოლის ახალი სამმართველო ფუნქციონირებას შეუდგა. სამმართველოს 10 საშტატო ერთეული ჰყავს. მისი ძირითადი ამოცანაა საჯარო სივრცეში გავრცელებული განცხადებების მონიტორინგი — კერძოდ, ადმინისტრაციულ სამართალდარღვევათა კოდექსით გათვალისწინებული სიძულვილის ენის ელემენტების შემცველი შინაარსების გამოვლენა.

პარლამენტის ადამიანის უფლებათა დაცვის კომიტეტის თავმჯდომარე, რატი იონათამიშვილი, სამმართველოს ამოქმედებას ეხმაურება. მისი განცხადებით, ახალი ერთეულის შექმნის გამოცხადებამ მაშინვე გამოავლინა ვინ გამოიყენებს სიძულვილის ენას ყოველდღიურად:

„მას შემდეგ, რაც სიძულვილის ენის წინააღმდეგ ბრძოლის სამმართველოს შექმნა დაანონსდა, ვნახეთ, რადიკალურ ჯგუფებს და იმ ადამიანებს რა რეაქცია ჰქონდათ, რომლებმაც ზიზღი და სიძულვილის ენა ყოველდღიური საქმიანობის ნიშნად აქციეს.”

იონათამიშვილი ამბობს, რომ სიძულვილის ენის გამოყენება დემოკრატიული ღირებულებების უარყოფასა და ძალადობრივი მიდგომების წახალისებასთან ერთადაა:

„ის, ვინც სიძულვილის ენას ირჩევს, სინამდვილეში ოპონირებისას ამჯობინებს ზიზღსა და ძალადობას და უარს ამბობს დემოკრატიულ პრინციპებზე.”

კომიტეტის თავმჯდომარის შეფასებით, ახალი სამმართველოს საქმიანობა მნიშვნელოვანია დემოკრატიული გარემოს განვითარებისა და მომავალი თაობებისთვის: „ჩვენი ვალდებულებაა, ქართული პოლიტიკური სივრცე სიძულვილის ენისგან გავწმინდოთ.”